Highlander tan final beiseina a sang

NorthEast United-in a vawi khat nana Indian Super League final lut turin beiseina an nei zel - Inrinni zan khan semifinal first leg-ah ATK Mohun Bagan chu 1-1 in an inhnehtawkpui a, Bagan tana David Williams goal chu Idrissa Sylla chuan hun pek belhah Highlander tan a sut a ni. 

Zirtawpni zan khan ISL semifinal hmasa zawkah FC Goa leh Mumbai City chu 2-2 in an inhnehtawk bawk a, second leg thlengin semifinal boruak a 'hot' dawn tih a chiang. 

Goan club hian Igor Angulo leh Saviour Gama hmangin vawi hnih ngawt hma an hruai a, mahse, Mumbai-in Hugo Boumous leh Mourtada Fall hmanga chhangletin beiseina an la insiam zel. 

ISL semifinal-ah away goal rule hman a nih loh avangin semifinal pahnihah team pali ten beiseina sang tak an la nei vek - zanin dar 7:30-ah Mumbai City leh FC Goa an inkhel leh ang. 

NorthEast leh Bagan 'budget' hi khaikhin chi a ni lo - Kolkata club hi ISL-a sum inseng na ber an ni hial mai thei a, Highlander erawh a seng tlem ber zinga mi an nih avangin beiseina a sang lo.

Rin lawk ang ngeiin minute 34-naah Bagan lamin goal an khung - Williams chuan Roy Krishna hnen aṭangin ball ṭha zet a hmu a, nalh taka Nim Dorjee a bum hnuin a duhnaah tak goal-a chhuih lut. 

NorthEast United tan Ashutosh Mehta chuan hun ṭha nei mah se crossbar a tauh per a, Luis Machado-a'n Bagan keeper Arindam Bhattacharja chauh a hmachhawn hnuah Arindam hian a ti tlu a, mahse, referee-in a en liam. 

Khalid Jamil-a'n huaisen takin thutlukna a siam a, minute 67-naah defender Benjamin Lambot la chhuakin striker Sylla a luhtir - Queens Park Rangers striker hlui hian a pu rinna ti hlawhtlingin hun pek belh minute linaah si phurh sutna goal a khung. 

NorthEast United tan Lalengmawia chuan inkhel bul a ṭan a, Lalrempuia Fanai chuan bench lamah hun a hmang tluan a, Rochharzela chu hliam vangin squad-ah telh a ni lo bawk. 

Khalid-a'n Highlander a enkawl tirhin Lalkhawpuimawia chu hliam vangin a talbuai a, Aizawl FC boss hluiin, "Tunah chuan a dam tawh a, ka chhawr thei tawh ang," tia Vanglaini hnena a sawi angin Mapuia hi squad-ah telh a ni a, khelmualah erawh a la lut lo. 

Tun season ISL match 11-a a team la tlawmpui lo Khalid chuan, "Bagan laka kan hnufual hnuin kan draw leh thei a, ka player-te thawhrim vang a ni," tiin a sawi. 

Highlander hian Thawhlehni zan dar 7:30-ah Bagan nen hian semifinal second leg an khel leh ang. 

Goa leh Mumbai inkhelah an inngam tawk hle, minute 20-na lekah Mumbai defender Mandar Rao Dessai chuan Jorge Ortiz-a tih tluk avangin penalty a chawi a, Angulo chuan harsatna nei loin goal-ah a chantir. 

Goa an hlim rei hman lo - player thiam bik Boumous chuan minute 18 hnuah Mumbai tan si phurh sutna goal-a khung a, 1-1 ni chungin chawlhlawk an hmang. 

Gaurs (Goa sawina) tan Saviour Gama chuan chhandamtu nih tumin minute 59-naah goal-a khung ve leh a, mahse, Goa an ding rei hleithei lo. Minute 61-naah Fall chuan si phurh a sut ve leh a, hun tawp thlenga goal dang lut loin 2-2 in an ṭin.

Mumbai boss Sergio Lobera chuan, "Goal khungna chance kan nei tam zawk a, draw result hi lawmna tur a ni lo," a ti a, Goa coach Juan Ferrando chuan, "Ka player zinga paruk chiah kha 100% fit an ni a, kan tan chuan a harsa a ni," tiin an chak zawh loh chhan a sawi thung.