London-ah German ral a lian

Thawhlehni zan Champions League last 16 first leg-ah Bayern Munich-in Chelsea 3-0 in an hneh a, German champion-in Stamford Bridge an luhchhuah. Frank Lampard-a'n Bayern Munich a hmachhawn hnuhnun ber ṭumin Allianz Arena-ah Champions League nomawi an chawi a, tunah erawh mual sir aṭangin Bavarians-in a naute an chaih phar lai en bak tih theih a nei lo.

Second leg hi March 18, Nilaini zan khian Allianz Arena-ah khelh tur a ni a, Chelsea tan quarterfinal lut turin beisei a tlem ta hle. Bayern Munich erawh an khelh danah an lungawi, club CEO Karl-Heinz Rummenigge-a'n inkhelh banah coach lai lawk Hansi Flick piancham (24 February) lawm nan 'pen' a pe a, contract thar ziahna turah a ngaih theih a ni.

Chelsea manager Frank Lampard-a'n Tottenham an hneh ṭuma starting eleven bawk a hmang a, Willy Caballero-a'n Blues kawr ha chungin a vawi khat nan Champions League-ah a inlan. Argentine keeper hian Manchester City leh Malaga tana a khelh laiin UCL-ah a inlan nual tawh thung.

Tlarhmaah tawnhriat nei ṭha Olivier Giroud chungah rinna nghah a ni a. Bench-ah Willian, Tammy Abraham, Pedro leh Kepa Arrizabalaga te an awm a, Lampard-a thutlukna hi a ṭha ber em tih zawhna erawh a awm thei thung.

Bayern-in Bundesliga-a Paderborn an hneh ṭumin an tlarhnung pawp deuh mah se Jerome Boateng leh Benjamin Pavard te an rawn let avangin inrintawkna an ngah sawt ang.

Bayern-in khualmualah attacking football an khel a, Caballero-a'n hna pawh a ngah. Robert Lewandowski goal khung tur Chelsea keeper-in ṭum hnih ṭha zetin a dang a, Kingsley Coman leh Thomas Muller-te'n goal pawnah chiah chiah an pet.

Muller hian crossbar a tauh per a, first half-ah Chelsea an him hram hram. Chutihrualin goal a luh miau loh avangin Blues-in beiseina an nei a, Marcos Alonso ball pet ṭha tak Manuel Neuer-a'n dang lo se result a danglam thei hial ang.

Bayern boss Flick-a'n first half-a an khelh danah a lungawi a, second half-ah pawh goal nawr chhunzawmin rah ṭha a thlen. Minute 51-naah Lewandowski ball pek fing tak chu Gnabry-a'n chiang zetin a pet goal a, Blues tlarhnung a pawp chhunzawm.

Minute thum hnu lekah Lewandowski ball pek bawk chu Gnabry bawkin goal-ah a chantir a, kum li liam taa English football-a hlawhchham Gnabry-a'n 'top player' a ni tawh tih a pholang.

Bayern-in dinhmun 

ṭha zawka awm turin left back hmuhnawm Alphonso Davies-a pass ṭha tak chu Lewandowski-a'n chu minute 76-naah a khung a, 3-0 in inkhel a tawp. Blues tan mangchhia a ni a, minute 83-naah Alonso hnawhchhuah a nih avangin hmabak a harsat belh bawk ang.

Bayern Munich-in Niko Kovac hoin season an ṭan a, Bundesliga nomawi chan thei dinhmuna an din hnuah assistant coach Hansi Flick chu team enkawltu atan an dah a, result ṭha a neih avangin season tawp thleng enkawl turin an dah nghal.

Flick-a hnuaia danglamna langsar chu Kovac-a'n a rin ngam loh Thomas Muller a ring ngam a, Bavarian ti Bavarian tu ber Muller hi Chelsea an hneh ṭum pawhin player pawimawh ber zinga mi a ni. Muller ang thoa Joachim Low-a'n Germany team-a koh a tum tawh loh Jerome Boateng-a'n rin a hlawh lo a, Kovac-a'n ring ngam lo mah se Flick erawhin David Alaba nen inkawptirin tlarhnung pawh a phui ṭha ta hle.

Stamford Bridge-a an khelh danah Flick-a ruahmanna a fuh a, midfield-a awm Thiago leh Joshua Kimmich te hmangin inkhel an thunun. Chelsea-in N’Golo Kante awm lo an tuar a, Ross Barkley a tawlh hma nasat avangin Jorginho leh Mateo Kovacic ten Bayern midfield an ngam lo. Thiago leh Kimmich inkawp ṭhat bakah player thawkrim Muller-a'n midfield a pui ṭha bawk.

Champions League chin hi chu a boruak a dang daih a, Bayern Munich an ṭha. Kan tum ang thlapa kan khel chhuak a nih loh chuan a harsa dawn tih hriat sa a ni a. Ṭan phat aṭangin an inringtawk lo a, kan khelh chhuah danah ka lawm lo. Zirlai thar kan zir belh. Europa League khel tawh mah ila Champions League knockout chin chu a dang daih.

Bayern nena kan inkhel hi team ni loin player kan inenfiah a ngai. Kan upat leh naupan lam a ni lo a, kan tih tur chin kan ti em tih lai zawk hi a ni. Kovacic khan tu nge a ni tih a pholang - khawi team-ah pawh eng anga inelna sangah pawh ṭha takin a khel thei ang. Midang zawk erawh inenfiah a ṭul a ni.

- Frank Lampard, Chelsea manager

Minute 90 chhung kan game plan anga khel turin rilru kan pe a, kan khel ṭhat avangin 3-0 a chak hi kan phu. Halftime lai khan first half-a kan khelh dan a ṭha a, second half-ah kan thawhrim lehzual a ṭul tih ka hrilh a, kan chance neih angte kan khung tak avangin ka lawm hle.

- Hansi Flick, Bayern Munich 

coach lailawk