Arsenal leh Xhaka an vanduai

Inrinni zan Premier League inkhelah Arsenal chu Burnley nen 1-1 in an inhnehtawk. Gunners lamin hun ṭha an hlah hnem bakah an beisei penalty pek an ni lo - goal an 'khilai' bawk.

Pierre-Emerick Aubameyang-a'n hmahruiana goal khung mah se chak nan a tawk zo lo. Granit Xhaka-a'n box chhunga a ball chan chu mual sir lama pek tumin pet mah se Chris Wood a per a, anmahni lamah a lut.

Burnley defender Erik Pieters-a'n Nicolas Pepe cross chu chiang takin a kutin beng tla mah se, VAR official Kevin Friend-a'n a endik hnuah penalty a pe lo. Pieters bawkin Pepe goal khung tur a kutin a dang nia ngaiin red card leh penalty pek a ni a, mahse VAR hman hnuah an sut.

Arsenal midfielder Xhaka chuan an goal chhuah chu a tihsual a nih thu a pawm a, "Ka tihsual vangin ngaihdam ka dil, football a thil thleng thei a ni a, hrehawm ka ti hle," tiin a sawi.

Inkhel dangah Champions League khelh tum Leicester City an chak. Foxes hian goal an phurh hnuah Brighton chu 2-1 in an lehthal a, league match hnuhnung pahnihah chak ni hmel an hmuh lo hnuin point thum an hlawh chhuak ve leh ta.