Chawnpui aia vannei Tuikual South

Mizoram Super League season 6 inkhel hmasa ber a hmuhnawm nghal, season hmasa finalist Tuikual South chuan kai thar Chawnpui chu 79-78 in an hneh hram. TSBC coach C. Lalrohlua chuan hnehna chang turin an vanneih thu Vanglaini a hrilh.

Thawhlehni zan Hawla Indoor Stadium, Republic Vengthlanga inkhelah team pahnih Mizo hlangin an inlan a, an inkhel tawk hle. 3rd quarter hmang ṭhatu Chawnpui lamin chak beiseina nei sang mah se boruak sanga che fuh Phengphehlep an vannei ta zawk a ni.

Tuikual South tana match hmasa berah Dennis Lalmuanpuia chu danglamna thlentu a ni. Dawrpui Vengthar forward hian point 19 a neih a, a point zat chiah hi rebounds la bawkin double-double a nei. Dede-a bakah hian F. Zodinthara (14 points) leh Lalfakzuala (16) te an pawimawh bawk.

Phengphehlep coach Marova chuan, "Third quarter-ah khan point kua chauh kan neih laiin anni lam khan point 25 an nei thung. Quarter hnuhnung bera kan tho chhuak thei kha ka lawm, player beidawng ve ngai lo kan neih bakah kan vannei," a ti.

MSL kai thar Chawnpui hi inbuatsaihna nei ṭha an ni a, player thawhhona a ṭhat avangin an inkhel a hmuhnawm. Laltlanhlua (15 points), Andre Lalhruai-tluanga (15), Jackson Lalrintluanga (13) leh K. Lalremsanga (12) te khel ṭha mah se hnehna chan nan a tawk zo lo.

TSBC hian an match lehpek atan February 28, Zirtawpni hian Zarkawt BCA an hmachhawn ang; Chawnpuiin February 29, Inrinni zanah Khatla TBL an bitum thung ang. Zanin hian inkhel hmuhnawm a awm leh dawn, champion lai BCA leh kai thar Ramhlun Sporting Club te dar 6:30-ah an inkhel ang.