PM-in a kawm zingah Mizo rawlthar Jeremy
Prime minister Narendra Modi chuan nimin khan India rama infiammi langsar tak takte chu video conference a neihpui a, an zingah hian Mizo rawlthar Jeremy Lalrinnunga pawh a tel.
India ram chhunga infiammi langsar a kawm zingah hian - India cricket captain Virat Kohli, legend Sachin Tendulkar, BCCI president Sourav Ganguly leh Rio Olympic silver medalist PV Sindhu, boxer lar M C Mary Kom te chu a langsar an ni.
PM-in a koh infiammi 49 bakah sports minister Kiren Rijiju te chuan Covid-19 vanga India ram chhunga infiamna neih theih a nih loh dan te, harsatna hrang hrang thleng chhunzawm thei bakah mahni awm hmuna taksa sawizawi a pawimawh ziate an sawi.
Vanglaini zawhna chhangin Youth Olympic gold medalist Jeremy chuan, "Coronavirus laka mipui kan him theih nan sorkar thu chhuak kan zawm a ngai, thuawih hi kan damna tur a ni," a ti. Mizoramah chuan tualchhunga hmalatute thuawih a pawimawh thu a sawi bawk.
Covid-19 vangin India ram chu April 14, Thawhlehni thleng atan a inkharkhip mek a, infiamna peng chi hrang hrang chu chawlh lailawk vek a ni a, inkharkhip hi pawh sei thei a nih avangin infiamna neih ṭan leh theih hun tur hi hriat a la ni lo.
Hriselna a pawimawhzia sawi zuiin Jeremy chuan, "Ina awm chung pawhin tih theih tam tak a awm, chung zingah chuan mahni phak ang tawka taksa sawizawi a pawimawh. Mizo mipuite mahni awm hmuna him leh hrisel taka awm zel turin ka duhsak," a ti.
Govt. Complex rawlthar Jeremy hian Tokyo Olympic khelh a beisei mek a, infiamna khawmpui lian hi nakkum nipui laia neih tura sawn hlat a nih avangin inbuatsaihna hun a ngah dawn, qualifier khelh chhunzawm tur a la nei bawk.