Belgium-in champion-ah Club Brugge an puang
Belgian Pro League chu coronavirus vanga European football-a league langsar zinga tihtawp hmasak ber a ni ta a, Belgium rama league sang ber hian table-a hmahruaitu ni lai Club Brugge chu champion-ah an puang.
Club Brugge hian table-ah point 70 neiin hma an hruai mek a, anmahni hnaih bertu Gent aiin point 15 laiin an sang zawk. Hetihrual hian Belgian Pro League hi Europe ram danga kan league hmelhriatte nen an kalpui dan a in ang lo.
League-a in el team 16 hi Belgian Pro League-ah chuan regular season tiin an inkhel kual vek a, an zinga a sang paruk hian Championship playoff an tih chu an khel leh ṭhin.
Championship playoff-ah hian team paruk hian regular season-a an point hmuh zahve ṭheuh kha an chhawm a, vawi hnih an inkhelh kual hnuah a sang ber chu champion atan puan an ni ṭhin a ni.
Covid-19 vanga league tihtawp a nih hian regular season-ah match khat chiah khelh tur a awm tawh a, mahse playoff tawp khelh tur a la awm thung.
Mahse, Belgian Pro League board of directors chuan thutlukna hi siamin, league tihtawp mai hi an rel a, hei hi general assembly pawmpui turin an thlen a ni.
Khawthlang media ten an tarlan dan chuan Club Brugge hi April 15-ah official takin champion-a puan an ni dawn a, hemi chhung hian relegation leh promotion kalpui dan tur chu a ngaihtuah tura ruat ten an lo ruahman ang.
Belgian Pro League chuan thuchhuah siamin, "Board of Directors chuan eng thil pawh thleng se, June 30 hnu lama inkhelh chhunzawm chiah a ngai lo a, he thutlukna hi a siam ta a ni," an ti.