Sharapova a lo kir dawn

World number 1 hlui Maria Sharapova chu thla thum chhung zet hliam vanga a inkhelh theih loh hnuah a dam tawh a, kar leha khelh tur Mallorca Open-ah a inlan dawn - tournament buatsaihtu lam chuan Russian nula inlan theih tur thu hi Thawhṭanni zan khan an puang a ni.

Grand Slam vawi 5 champion tawh Sharapova hi a dar (shoulder) na vangin a buai fo tawh a, 2008 aṭang daih tawh khan he a natna hian a tibuai ṭhin tawh. Tun hnaiah zai a ni a, beisei ang hunah rawn kir thei lo mah se Wimbledon khel turin inbuatsaihna hun a nei thei dawn niin a lang.

Kum 32 mi Sharapova hi damdawi hman phal loh a hmang tih hriat chhuah a nih vangin thla 15 hrem a ni tawh a, hremna hi 2017 khan hmang zo tawh mah se beisei angin a la khel chhuak leh rih lo. Tennis court chhunga a inlan hnuhnung ber chu January thla a khelh St Petersburg Open daih tawh kha a ni.

Mallorca Open buatsaihtu lam chuan thuchhuah siamin, "Kar khat chuang inbuatsaihna leh inngaihtuahna hun kan hman hunah Maria Sharapova chu a inlan thei dawn tih a hriat ta a, duhsak takin wildcard pek a ni ang," an ti. Sharapova ang bawkin Venus Williams pawh wildcard an pe bawk.

Grass court inelna Mallorca Open-ah hian Sharapova bakah Wimbledon champion Angelique Kerber leh world number 1 hlui Victoria Azarenka te an inlan dawn bawk a, Roland Garros semifinalist Amanda Anisimova leh Belinda Bencic ten hming an pek luh bawk avangin inelna a hmuhnawm hle ang.