South Africa semifinal beiseina a chau

Ruahsur vangin Thawhṭannia South Africa leh West Indies inkhel chu tihtawp a ni a, ram pahnihin point khat ve ve an hmu. Kumin Cricket World Cup-ah ruahsur vanga inkhelh zawh theih loh vawi hnihna chiah a ni.

Hampshire Bowl, Southampton-ah West Indies chu coin toss-ah an chak a, vawm hmasak an thlang. Over 7.3 chauh an la khel hman chungin Proteas hian Hashim Amla leh Aiden Markram te an chan hman a, run 29 siam hman mah se ruahsurin a chhan tiin a sawi theih.

Amaherawhchu, Proteas hi match hmasa pathumah an chak loh vek avangin ruahsur vanga point khat an hmuh hi a lawmawm lo a, risk laka point hnih hmuh kha an tan a thlanawm zawk. South Africa captain Faf du Plessis chuan,

"Kan dinhmun a ṭha lo takzet a, tumah dem theih kan ni lo - kan thiam loh vek a ni. Kan theihna angin kan khel chhuak lo a, inrintawkna nei let turin ṭha taka khelh kan mamawh," tiin a sawi.

Windies bowler Sheldon Cottrell chuan wicket hnih a la hman a, captain Jason Holder chuan, "Ball tharah Sheldon-a'n bul a ṭan ṭha a, kan khel ṭha. Ruah a sur ta kha pawi kan ti hle," tiin point khat an hlohah a ngaih thu a sawi ve bawk.

South Africa hian June 15, Inrinniah Afghanistan an hma-chhawn dawn a, chak ngei an inbeisei tawh ang. West Indies hian June 14, Zirtawpniah inelna thlengtu England an hmachhawn dawn a, Eoin Morgan leh a hote lakah fiahna hautak an hmachhawn dawn.