Golden State tan minute 48 dang a la ngai

Point khat chauhin Golden State Warriors chuan Toronto Raptors an hneh hram a, NBA champion hian an nomawi humhim tur erawh chuan hna hautak an thawh chhuanzawm a la ngai. Zirtawpni zing dar 6:30 hian Oracle Arena, Oakland-ah game 6 khelh a ni ang.

Raptors lam hian best of seven series-ah chu 3-2 in hma an hruai mek a, match khat chauh pawh hnehna an chang leh a nih chuan a vawi khat nan basketball inelna sang berah a vawi khat nan an champion dawn.

Basketball inelna sang leh ngaihhlut NBA-ah quarter li an khel ṭhin a, quarter tin hi minute 12 zel a ni - match khat rei zawng chu minute 48 tihna a ni. A zawna vawi thum champion tum Warriors lam tan an khelmuala an match hnuhnung ber a ni tawh dawn a, an theihna zawng zawngin an khel dawn.

Golden State guard Stephen Curry chuan, "Beiseina nung nei turin minute 48 chhung chu kan theihna zawng zawng kan hlan leh ang. Player tinin Warriors jersey kan ha a ni tih kan hriat a ngai a, chutiang tak pawh chuan kan khel chhuak ngei ang," a ti.

NBA Most Valuable Player vawi hnih ni tawh Curry hi GSW player pawimawh leh innghahna a ni a, tun season playoff chinah chawhrualin match tina point 34.2 nei zel ang a ni. Amah thlawp tur hian tawnhriat ngah Klay Thompson leh Draymond Green an la awm bawk - Green erawh a fimkhur a ngai dawn, technical foul a nei leh a nih chuan match khat atan hrem a ni ang.

American player Curry chuan sawi zawmin, "Oracle Arena-ah fans puihna kan hmu ṭha leh dawn, kan hun hnuhnung a nih zel tawh avangin engkim mai hi a ṭha thei ang bera khar kan duh. Boruak a nuam leh dawn a, a pawimawh ber chu player ten inpumpekna kan neih a ni ang," tiin a sawi.

Warriors hian 1971 aṭanga an luah tawh Oracle Arena hi tun season bak an hmang tawh dawn lo, season tharah chuan San Francisco-ah an awm tawh ang. NBA arena zinga hlui ber ni mek hi Zirtawpni zing bak hi inelna pangngai khelh nan an hmang dawn tawh lo tihna a ni - hnehna chan an duhna a sang zual ngei ang.

Scotiabank Arena-a game 5 an khelh ṭumin quarter hnih-naah Golden State thiampuipa Kevin Durant chu ke artui hliam vanga lakchhuah a ni a, naktuk zingah pawh a inlan theih a beisei awm loh - game 7 khelh a ngai a nih pawhin a dinhmun a chiang rih lo.

Toronto court a chhuhsan dawn hian fans lamin an lo au el a, ṭhenkhat phei chuan an lawm thu ring tak takin an au rual pui hial - an elpui player pawimawh a chhuak chu pawi an ti lo, a hunlai boruak leh an thil tawn ngaihtuah chuan an thil tih hi dem ngawt theih an ni bik lo ang.

Mahse, hmelma player laka an chet dan vangin Raptors fans lamin dem an hlawh a, an zinga pakhat chuan twitter kaltlangin ngaihdam dilna thu a thawn ta hial. Raptors fan pakhat Jessica Kleinschmidt chuan, "Canada khawpui hmingin ngaihdam ka dil e, kan ṭawngṭai pui che a, dam leh thuai ang che.

"Duh tak KD leh Warriors, natna in tawrh laia kan khawsa zia kha a pawi kan ti a, inkhel entu zinga khan ka awm ve reng. Thil thlen dan kha a pawi ka tiin infiamna huang chhungah chuan awm lo se ka duh zawk, Canada hian ngaihdam kan ngai a ni," a ti.

Fan ngai loh rama cheng mek Nick Nurse-a naute hian an match hmasa lamah khualmuala hnehna chan an harsat lo tih an lantir tawh a, naktuk zingah pawh an zam lo ang. Raptors coach Nurse chuan, "Game 5 bika time out ka lak hun kha a fuh lo tia sawisel a tam, point ruka kan san lai a nih avanga sawisel an ni. Tunah chuan tihsual leh sawisel tur awm loa khelh kan tum ang," a ti.