Infiammi $um lalut tam ber Messi

American business magazine lar Forbes chuan June 11 khan tun hnai thla 12 chhunga infiammi sum lalut hnem 100 a tarchhuak a, Lionel Messi chu sum lalut hnem ber a ni.

Forbes list-ah hian footballer lar pathum Messi, Cristiano Ronaldo leh Neymar te an intlar a, boxer Canelo Alvarez chuan dawtin panganaah tennis legend Roger Federer a awm.

Nikuma Forbes-in a tarchhuah Floyd Mayweather chu sum lalut hnem ber a ni a, tun ṭumah erawh a lang pha lo.

Mayweather hi Conor McGregor nen an inhnek ṭum khan dollar maktaduai 300 a hlawh niin an sawi a, hei ringawt pawh hi pakhatna nih pui tham a tling.  American boxer hi kum 42 mi a ni tawh a, professional fight vawi 50-ah chak vekin tunah chuan a chawlhsan tawh.

Forbes ranking hi kum 1990 aṭanga ṭan a ni a, Barcelona star Messi hi a chung bera awm thei athlete pariatna chauh a ni.

Football bikah Messi hi Cristiano Ronaldo dawta hetiang dinhmun hauh thei hmasa ber a ni a. Pahnihina Ronaldo hi 2016 leh 2017 khan pakhatna a ni a, nikum aṭang khan Messi hnuaiah a awm ta thung. Tun ṭum hi footballer pathumin a sang pathum an luah vawi khat a ni a, top 100-ah erawh footballer 12 chauh langin sum lalut tam palina Paul Pogba pawh list-ah chuan 44-na chauh a luah pha.

Barcelona legend Andres Iniesta pawh a vanglai aiin sum a lalut tam a, 46-naah awmin Japanese club Vissel Kobe tan khel mekin dollar maktaduai 32.5 a lalut pha. Kum 27 mi Oscar pawh football khawvelah a hming reh tawh mah se Shanghai SIPG a pan chhan rawn langin infiammi sum lalut tam 66-na a ni.

Sum lalut tam leh khel ṭha a danglam tih chiang takin a lang a, Manchester United tana khelhna hmun chang pha mang lo Alexis Sánchez chu 53-na a nih laiin Champions League-a Liverpool champion puitu Mohamed Salah chu 98-naah a awm daih thung.

India captain Virat Kohli chu cricket aṭanga hming lang awmchhun a ni a, Indian zingah pawh amah lo chu lang dang an awm lo.

Kum 30 mi Kohli hi nikum khan 83-na a ni a, kumin erawh 100-naah a awm. India captain hi hlawh leh an chakna aṭang chuan dollar maktaduai li a lalut a, endorsement aṭanga a lakluh zat chu dollar maktaduai 21 tehmeuh a ni.

Hming 100 lang zingah hmeichhia pakhat chiah a awm a, tennis player ropui Serena Williams chu 63-naah a awm. 

Kum 37 mi Serena hian nau a pai laiin 2017 Australian Open-ah a champion a, fa a neih hnuah erawh ngai a awh tawh lo. Chutihrualin nikum khan Wimbledon leh US Open-ah final a lut ve ve a, tun ṭuma dinhmun sang tak a thlen theih chhan hi a ni.

Ferrari driver Sebastian Vettel-a'n racing track-ah Mercedes driver Lewis Hamilton a pha lo a, Forbes ranking-ah pawh Hamilton a chungnung zawk. British driver Hamilton hian dollar maktaduai 55 lalutin 13-naah a awm a, Vettel erawh 30-naah a awm pha chauh thung. Hamilton hi boxer Anthony Joshua nenan sum lakluh zat a inang a, British infiammi zinga sum lalut tam ber an ni.

America rama infiamnaah sum a tam a; American football, basketball leh baseball player-ten sum an lalut hnem hle.

Sum lalut tam 100 zinga 62 hi US star an ni a, NBA-in player 35 ngawt an thawh. Basketball player zingah LA Lakers star LeBron chu sum lalut tam ber a ni a, Golden State Warriors duo Stephen Curry leh Kevin Durant te nen top 10-ah an lang pha.

Golf legend Tiger Woods pawhin tun hnaiah hming a rawn chher thar a, kum 43 mi golfer hian 11-na hial a rawn luah a ni.