Tlai dar 3:00-ah khingpui la hneh vek India Vs New Zealand
India-in match hmasa pahnihah player thlak danglam loin an chak ve ve a, vawiin tlai dar 3:00-a New Zealand an hmachhawn hunah erawh loh theih loin an insiksawi a ṭul dawn. Tun World Cup-ah khingpui la hneh vek pahnih hi Trent Bridge Cricket Ground, Nottingham-ah an inhmachhawn dawn.
Inkhel en châkawm hi ruahsur vangin a dinhmun a chiang lo a, nimin lamah chuan helai hmun hi chhum a zing tam hle. Thawhlehni tlaia Bangladesh leh Sri Lanka inkhel tur pawh ball khat pawh vawm loin ruahsur vangin ṭhulh a ni.
Shikhar a tel lo
Australia laka century siamtu Shikhar Dhawan chu a kut vei lam ruh a khik avangin match thum tal a khel thei dawn lo a, New Zealand nen an inhmachhawn hunah Rohit Sharma nena an inkawp hmuh tur a awm dawn lo.
Shikhar awm lo hi KL Rahul tan hun ṭha a ni thei a, Aussies nen an inkhel ṭuma batting order paruknaa awm Rahul hian World Cup warm up match-a Bangladesh an hmachhawn ṭumin century a siam a, Black Caps nen hian bul a ṭan a rinawm.
Plan B chu
India 'Plan A' a hlawhtling a, South Africa leh Australia te an hneh tawh. New Zealand nen Plan B an thawhchhuahpui a ngai dawn a, number 4 slot chu Vijay Shankar emaw Dinesh Karthik-a'n an hnawhkhah a ṭul dawn.
Men in Blue khingpui tur New Zealand hian tun World Cup-a wicket la tam pali zinga pathum Lockie Ferguson, Matt Henry leh James Neesham te an kawl avangin talent nei ṭha Rahul tan pawh opener nih a châkawm lo ang.
Wicket riat la tawh Lockie Ferguson hian 150kmph ten a vawm thei a, Trent Bridge pitch hi pace bowler te duhthusam a nih avangin India batsman tan fiahna hautak paltlang a ṭul dawn. India captain Kohli-a'n Australia an hmachhawn ṭumin mawhphurhna a la zo a, New Zealand lakah Shikhar Dhawan a awm dawn loh avangin a pawimawh lehzual ang.
Black Caps lam hi
New Zealand match hmasa pathumah batting order hmasa lam an che ṭha a, middle order lamin hna an nei meuh lo.
India erawhin bowler an nei ṭha a; Martin Guptill, Colin Munro leh Kane Williamson te ṭha viau mah se innghahna tluan tling an ni kher lo ang. Hei vang hian Black Caps tan match hmasa pali chak tur chuan middle order te an che ṭhat a ṭul dawn.
A tawi zawng chuan ruah a sur lo a ni chuan New Zealand leh India inkhel hi cricket ngainatute tan chuan hmaih a thiang lo ang.