Warner hmangin Australia-in Pakistan an hneh

Cricket World Cup champion lai Australia chuan India an hneh loh hnuah insiamṭha nghalin Nilaini khan run 41-in Pakistan an hneh. Opener David Warner chuan ball-tampering vanga hrem a nih hnua a vawi khat nan century a siam a, Aussies chakna kawngah player pawimawh a ni. 

Pakistan hian Pathianni tlai dar 3:00-ah India an hmachhawn dawn a, ram inhal pahnih an nih avangin final tluk zetin a pawimawh. Men in Blue hian nimin khan New Zealand an hmachhawn thung.

Aussies left hand batsman Warner hi 'ball tampering' vangin a hming hliau a, Pakistan an hmachhawn hmain a khel ṭha tawk lo bawk.

Kar liam ta Inrinni khan net session-ah Warner hian net bowler Jaykishan Plaha chu na zetin a vuak per a, Plaha an enkawl lai hian Aussies opener hi a hlauthawng tih a lang thei. India an hmachhawn ṭumin Warner hian ball 84 zet hmachhawn mah se run 56 chiah a siam a, Australia chak lohna chhan pakhata sawi a ni.

Pakistan nen erawh kum 32 mi Warner leh captain Aaron Finch ten bul an ṭan ṭha a, an pahnih ringawt hian over 22-ah run 146 an siam hman a, Australia hi chak turin dinhmun ṭha takah an ding. Finch (82) out hnuah Warner che ṭha chhunzawmin ball 111 lekah run 107 a siam. Australia batsman dangte an che ṭha lo a, amaherawhchu bul ṭantute chet ṭhat zarah run 307 an siam a, Pakistan bowler Mohammad Amir an ngam loh avangin over 49-ah an thi vek.

Pakistan bowler Mohammad Amir chuan run 30 chauh pein wicket nga zet a la a, a hnathawh ropui tak avangin Pakistan-in beiseina an nei a, nuam sain Australia an awm lo.

Amaherawhchu, Pakistan bowler Fakhar Zaman chuan ball thum chauh a hmachhawn tihin run siam loin a thi. A bul ṭanpui Imam ul-Haq-a'n run 53 siam mah se ball 75 zet a hman avangin an target aṭanga teh chuan a khel ṭha lo.

Pakistan tan che ṭha fal an awm lo a; Wahab Riaz (45), Mohammad Hafeez (46) leh Sarfaraz Ahmed (40) te run pangngai tak thawh vekin chak beiseina nei hman mah se a tawp dam thleng thei an awm lo. Australia bowler ten over 45.4-ah Pakistan hi run 266 an siam tihin an vawm hlum vek a, champion lai an him hram.

Pakistan captain Sarfaraz Ahmed chuan, "Ball 15 chhung lekin wicket thum kan hloh a, chu chu ka chak lohna chhan a ni. Chubakah chuan kan bowler zingah Mohammad Amir tih loin run an pe hnem lutuk a, over hmasa 20-a kan che chhe lutuk kha kan tuar a ni," tiin a sawi.