Inrinni zing aṭangin Copa America

South America ramte tana football inelna lian ber Copa America chu Inrinni zing aṭangin khelh ṭan a ni dawn a, zing dar 6:00-ah inelna thlengtu Brazil leh Bolivia an inkhel ang.

Copa America-ah hian South America ram 10 bakah tel tura sawm Japan leh Qatar te chu group pathumah pali zela ṭhendarh an ni a. Group tin aṭanga tiṭha pahnih bakah pathumna zinga tiṭha pahnihin quarterfinal an lut dawn.

Group A-ah Brazil, Bolivia, Venezuela leh Peru te an awm a, group B-ah Argentina, Colombia, Paraguay leh Qatar te awmin group C-ah Uruguay, Ecuador, Japan leh Chile te an awm thung.

Argentina hian 1993 hnuah an champion leh tawh lo a, final erawh 2004, 2007, 2015 leh 2016-ah te khan an lut thung. Lionel Messi telna team hi champion rinkai zinga mi a ni a, nomawi tam tak Barcelona lakpui tawhtu hian an ram hi inelna lianah a la champion pui lo.

Messi hi kum 31 mi a ni tawh a, hun tam a nei tawh lo. Khawvela player ṭha ber ang hiala an chhal Messi hian an ram hi World Under-20 Cup leh Olympic gold medal lakpui mah se senior team-ah chhuan tur a nei lo a, footballer ṭha ber an sawi apiangin tehfung pawimawh tak avang hian a thiamna sawi nepin a awm ang.

Khawmualpui anga football inelna upa berah hian khawvel player manto ber Neymar a khel thei dawn lo a, Brazil tan channa nasa tak a ni ang.

Brazil hian Copa America an thlen apiangin an la champion ziah a, amaherawhchu an rama World Cup an thlen ṭumin Germany hmaah an mualpho. Chu chauh a ni lo, Copa America hnuhnung pathumah quarterfinal an kal pal thei lo. Kum thum liam ta khan group stage-ah an tla a, Brazil mipui lawmna tur chu nomawi a ni.