FIFA Women's World Cup Germany leh France ten knockout stage an lut

FIFA Women's World Cup-ah inelna thlengtu France leh champion rinkai zinga mi Germany ten match hmasa pahnihah hnehna chang ve vein knockout stage an lut.

Nilaini zan inkhelah France-in Norway 2-1 in an hneh a, group A hmahruaitu niin inkhel dangah Nigeria-in South Korea 2-0 in an hneh ve bawk. Group B inkhelah Germany-in an elpui Spain 1-0 in an hneh a, last 16 an lut chiang.

France leh Norway-in an match hmasa berah an khingpui South Korea leh Nigeria an hneh ve ve, chuvangin Allianz Riviera, Nice-a ram pahnih inkhel hi group hmahruaitu zawnna a tih theih.

Les Blues ṭan turin entu 34,872 zet an pung khawm a, manager Corinne Diacre chuan bul ṭan turin tawnhriat nei ṭha player a luhtir a, player kum chawhrual hi kum 28 leh ni 189 niin Women's World Cup-a chawhruala inkhel bul ṭantute upat ber ṭum a ni.

France tan Valerie Gauvin chuan second half ṭantirh chiahah khung mah se Wendie Renard-i'n minute 54-naah mak takin an lamah a tilut a, 1-1 a ni lehnghal. VAR-in inelna thlengtu tan lawmna a siam a, France-in penalty hmuh phahin Eugenie le Sommer-i'n penalty aṭangin chakna goal a khung.

Les Blues manager Corinne Diacre chuan, "Kan tih tur kan ti a, chutihrualin champion tura rinkai kan la ni pha lo," tiin a sawi.

Stade du Hainaut-a inkhelah Spain-in inkhel thunun hret mah se tlarhnung phui ṭha Germany-in hnehna an chang.

Germany tan hian Bayern Munich midfielder Sara Daebritz-i'n minute 42-naah goal awmchhun a khung a, chakna goal a nih bakah last 16 luhna goal a ni. Martina Voss-Tecklenburg hote hian March 2018 hnuah match 14 khel leh tawhin hneh loh an la tawng lo a, Spain nen ṭum nga an inhmachhawnah chak loh an la nei lo bawk.

Women's World Cup-ah hian team 24 chu group parukah ṭhenhran an ni a, group tin aṭangin a sang pahnih ṭheuhin knockout stage an lut dawn. Hei bakah hian group tina pathumna aṭanga tiṭha paliin group stage an paltlang ang.

FIFA hnuai inelnaah hi chuan goal difference dah pawimawh a ni a, point hmuh zat inang an awm a nih chuan head to head ni loin goal difference en tur a ni. An la intluk a nih chuan goal khung tam zawk en tur a ni a, chuta an la intluk cheu a nih chuan head to head en chauh tur a ni ang.

Tehfung hrang hrang hman hnua an la intluk a nih chuan fairplay point en tur a ni a, an card hmuh dan thlenga an la inang a nih chauhin ṭhumvawr tur a ni.

Nigeria    2 - 0    South Korea

NIG : Kim Do-yeon 29' (OG); Asisat Oshoala 75'

Germany    1 - 0    Spain

GER : Sara Dabritz 42'

France    2 - 1    Norway

FRA : V. Gauvin 46'; Eugenie le Sommer 72' (P)

NOR : W. Renard 54'  (OG)

Japan    6:30 PM    Scotland

Jamaica    9:30 PM    Italy

England    12:30 AM    Argentina

Netherlands    6:30 PM    Cameroon

Canada    12:30 AM    New Zealand

June 16, Pathianni

Sweden    6:30 PM    Thailand

United States    9:30 PM    Chile