Hringnun leh basketball chu a dang - Leonard

Toronto Raptors forward Kawhi Leonard chuan, basketball bika a hun tawn san ber ṭum a tawng chho mek a, infiamna huangah hlawhtling chho viau mah se a hringnuna hun harsa a paltlang tawh chu a la theihnghilh loh thu a sawi chhuak.

Tukin hian NBA Finals game 6-ah Raptors hian champion lai Golden State Warriors an hmachhawn a, an chak a nih chuan a vawi khat nan NBA champion an ni ang. An chak lo a nih erawh chuan Toronto lamah game 7 an la khel leh dawn a ni.

Dinhmun sang taka a awm lai pawhin Leonard chuan a hun kal tawh a theihnghilh lo. Kum 2008 khan  Leonard hi kum 16 mi chauh a la ni a, a pa Mark-a chu car silna hmunah kah hlum niin, tun thlengin Los Angeles hmuna pawikhawihna hi thilsual titu man chhuah a la ni lo.

Leonard chuan, "Thil a thleng tawh a, a hunlai kha chuan thildang reng ka ngaihtuah thei ngai lo. Tunah erawh hun a kal liam tam ta a, ka ngaihtuahna zawng zawng a luah tawh bik lo. "Ka thil tawn tawh tam tak aṭangin thil ka zir chhuak a, hringnun hi ṭhuang hnihin a kal tih pawh ka hriat phah. Tun chu basketball hun a ni a, hlim leh nuamti taka inkhelh hun a ni," a ti.