Kvitova dinhmun a chiang lo
Petra Kvitova chu vawi hnih a champion tawhna Wimbledon khel lo thut thei dinhmunah a ding mek, inbuatsaihna tournament pakhat Birmingham Classic-a inlan a tum pawh a ban hliam vangin a inhnukdawk.
Kum 29 mi Kvitova hi tun dinhmunah world number 5 a ni mek a, 2011 leh 2014-a a champion tawhna hmunah hian inlan thei se chuan champion thei tura rinkai zingah a tel phak dawn. Mahse, French Open hnua a inelna hmachhawn hmasak ber tur chu a khel thei lo ta phawt a ni.
Twitter lamah a inhnuhdawh thu sawiin Kvitova chuan, "Birmingham lama kal tur chuan ka tan a la hma lutuk deuh a ni. Tunah chuan Wimbledon ka khelh ngei theihna turin theihtawp ka chhuah dawn a, kan dam hma theihna tura ka hriat ang ang chu ka ti vek ang," a ti.
Season hmasa khan Kvitova hian British number 1 Johanna Konta hnehin Nature Valley Classic-ah hian hlawhtlinna a lo chang tawh, grass court inelna zingah chuan hmeichhe player-te ngainat leh inkhelh nuam an tihna hmuna a inlan thei lo tur chu pawi a ti hle.
Czech Republic nula chuan, "Birmingham-ah hian hun chhinchhiah tlak ka lo tawng tawh, ka ban hliam zai a nih hnua nomawi ka chawi lehna hmasa ber a ni a, kuminah inlan thei lo mah ila nakkumah chuan ka inkhelh theih ngei ka beisei," tiin a sawi.
Birmingham-ah hian French Open champion Ashleigh Barty, Australian leh US Open champion Naomi Osaka bakah world number 3 Karolina Pliskova te an inlan dawn avangin inelna a hmuhnawm dawn.