Cancer vangin Lee Chong Wei a chawl

Lee Chong Wei chuan nimin khan cancer vangin badminton a mangṭha thu a sawi.

Malaysian tlangval thutlukna hian khawvel a deng chhuak nghal a, amah ngaina leh hmangaih tute bakah badminton fans tam tak mittui a ko chhuak. A chawlh thu sawiin, world number 1 hlui Chong Wei chuan, "Zep thu a awm lo a, ka chawlh tur thu sawi hi a harsa ka ti hle. Duhthusamah chuan Olympic Games khelh leh phawt ka duh, mahse ka hriselna ka ngaih pawimawh a ngai a, ka taksa dinhmun ngaihtuahin he thutlukna hi ka siam a ngai," tiin a sawi.

Mittui tla vanga rei vak lo a ngawih hnuah Malaysian star chuan sawi zawmin, "2012 khan nupui ka nei a, mahse honeymoon pawh kan la hmang lo. Tunah chuan a hlimna turin hun pawh kan nei tawh ang," tiin hun harsaah a êng zawngin a thlir. 

Nikum khan Chong Wei hi a hnar (nose) a cancer tih hriatchhuah a ni a, a natna hi hriatchhuah hma a nih avangin enkawl dam theih tura ngaih a ni. Taiwan-ah a ṭha thei ang bera enkawl a ni a, amah ngei pawhin badminton court chhunga let leh theih ngei a beisei thu a sawi tawh ṭhin.

Mahse, kum 36 mi Chong Wei hi a duh leh beisei angin thil a kal vek bik lo. March thla a khelh All England Championship-ah khan rawn kir hman tura beisei a ni, amaherawhchu a hriselna dinhmun a ṭha thei lo a, kumin April thla hnu lamah training a nei thei tawh lo.

Badminton Association of Malaysia (BAM) president Norza Zakaria chuan an fachuam thlahna thu sawiin, "Kan tan chuan ṭahna ni a ni, Lee hi ram tana mi inpe zo leh a theihna zawng zawng hlan ṭhin mi a ni a. A hnathawh hi kan theihnghilh tawh ngai lo ang," tiin hun lo taka ram hmangaihtu Lee chawl chu pawi a tih thu a sawi.

Ṭhianho zinga a ṭha ber nih a awlsam lo a, veng leh khua tana mi bik nih pawh a harsa; khawvela a ṭha ber nih phei chu mi bik leh hrat khawkhengte chanpual a ni. Cancer vanga chawl Lee Chong Wei hi chawlhkar 199 chhung zet badminton world number 1 ni thei a ni.

Kum 2008 August thla aṭanga 2012 June thla thleng khan a chung ber dinhmun hi a zawnin a luah thei a, Malaysian badminton player zingah world number 1 ni thei  palina a ni a, kum khat aia tam a chung bera awm thei awmchhun a ni thung.

Player zawng zawngin an mahni infiamna huanga a ṭha ber nih an duh a, nomawi chawi châk bik an nei bawk. Lee Chong Wei hian Olympic final vawi thum a khel tawh a, mahse a vanneih tawk loh avangin silver medal vek a hlawh chhuak.

Beijing Olympics 2008-ah final a lut a, hemi hma kum 11 chhung hian Malaysian badminton player zingah infiamna khawmpui liana final lut thei an awm lo - 2012 leh 2016 khan final a lut zui leh bawk avangin an ram tan chuan mi bik a ni. Tokyo Olympics khelh leh ngei duh mah se a dam fel theih loh avangin a chawlh a ngai ta zawk a ni.

Infiamna khawvela team inelna bik an awm ṭhin, singles player zingah pawh inel fal an awm deuh zel. Badminton huangah chuan Lee Chong Wei leh Lin Dan te chu inelna hmuhnawm leh ropui chhawp chhuaktu an ni.

Olympic final-ah Lee leh Lin Dan te hi vawi hnih an inhmachhawn a, tournament hrang hrangah an intawng tam hle bawk. Chinese shuttler Lin Dan a chungnung zawk a, amaherawhchu ani aia player tawnhriat ngah zawk nen an inelna karah hian Lee-a'n world super series title 46 zet a la thei tho a ni.

Nikum World Championship khelh hma lawk khan Lee hi a cancer tih hmuh chhuah a ni a, a natna hi a tir lam ala nih avangin dam thei tura ngaih a ni. Zai a nih hnuah ṭhat lam a pan chho zel, kumin January thla khan training pawh a zawm leh hman.

Beiseina sang tak nen 2020 Olympics a thlir a, kum 36 mi ni tawh mah se a taksa a fit ṭha a nih phawt chuan player dang tana hmachhawn châkawm loh berte zinga mi a la ni ang. Mahse, nimin khan a beiseina a thamral tih a puang a, badminton court pawnah hringnun a hman chhunzawm a ṭul ta zawk.

Indian badminton star Kidambi Srikanth chuan thlahna thuchhuah siam ve nghalin, "I hma hun lo awm leh zel turah thil ṭha i tawn theih nan duhsakna ka hlan a che, mi danglam leh ṭha bik i ni a, ka player hmachhawn tawh zinga tawhkhirh berte zinga mi i ni," tiin badminton legend hi a thlah.