Ngaihven hlawh India Vs Pakistan

Pathianni tlai dar 3:00 hian India leh Pakistan te chu Old Trafford Cricket Ground-ah an inhmachhawn dawn.

Cricket World Cup semifinal emaw final-ah an inhmachhawn nawn lo a nih chuan tuna an inkhel tur hi kumin inelnaa ngaihven hlawh ber tih pawhin sawi theih a ni ang.

Khelmual pawna India leh Paksitan indona hi chu tlang hriat a ni a, inremna awm chuang si loin thisen tam tak a luang ral tawh. Ram pahnih buaina hi chinfel theih a ni lo a, an buaina hi infiamnaah pawh sengluh a ni ta zel.

Kum 2013 hnu khan ram pahnih hi inelna lian a nih loh chuan an inhmachhawn duh lo. Kumin February 14-a Pulwamna attack vangin boruak sang sa belhchhahin a awm. Hel pawl Jaish-e-Mohammed zinga mi Adil Ahmad Dar chuan Central Reserve Police Force (CRPF) sipaite chuanna convoy beiin thihchilh bomb a tipuak a, he thil thlengah hian mi 40 zet an thih phah.

Pakistan sorkar lamin an tih a nih loh thu an sawi a, thil thlen dan an dem thu sawi mah se India sorkar an lungawi bik lo. Hei vang hian India sorkar leh BCCI lam chuan Pakistan hmachhawn loh thlengin ngaihtuahna an seng hman a, captain Virat Kohli pawhin hotute thutlukna apiang an pawm tur thu a sawi.

Tunah erawh India an inphah hniam a, Pakistan hmachhawn an remti. Kohli leh a hote tan hna a inṭan ta chiah a, an hna tur chu cricket dan ang thlapa Pakistan sawp a ni ang.

India leh Pakistan inkhel tur hi TV lamah mi tluklehdingawn khat chuangin an en beisei a ni a. Old Trafford lama inkhel en man kar khat liam ta kha chuan US dollar 6000 ten an zuar chhawng tawh a, India pawisa chuan nuai li chuang hret a ni.

An inkhelhna hmunah hian entu 26,000 chauh an leng a, ticket hrim hrim hi chu an zawrh ṭan aṭanga darkar 48 chhungin an hralh zo nghal. India ṭantuten hmun 2/3 ticket an chang a, Pakistan ṭantute hian 18% vel an changa ngaih a ni a, chumi awmzia chu entu lamah chuan kawr hring aiin kawr pawl an tam zawk dawn tihna a ni.

Cricket World Cup-a TV kaltlanga entu tam ber ṭum chu 2015-a India leh Pakistan inkhel kha a ni a, tun ṭumah hian record thar awm ngei tura ngaih a ni. 

India-in Australia nena inhliam Shikhar Dhawan an chhawr thei dawn lo a, Pakistan an hmachhawn hmain training an nei ṭha tawk lo. Thawhlehnia an training tur chu ruahsur vangin ṭhulh a ni a, Ningania New Zealand nena an inkhel tur pawh ruahsur vang thoin an khel thei lo.

India captain Virat Kohli chuan, "Hetiang inkhel ngaihven hlawha kan tel ve thei hi kan vannei a ni. Khelmual kan luh tawh chuan rilru a fim a, chutih rualin inkhel chhehvel boruak lian tak erawh vawi khat khelhna tur tan chuan buai theihna a tling. Keini tan chuan kan thiamna lantir hun a ni," tiin a inring tawk hle.

Men in Blue hian tun World Cup-ah tlawm an la nei lo a, Pakistan lakah an chak loh leh si chuan an result ṭha hi chawhreh a ni dawn. Tun ṭum hi Shikhar Dhawan-a tel lohna India team fiahna mai a ni lo a, 'Player-te'n eng ang chiahin nge ram an hmangaih?' tih fiahna a ni tel dawn an ti hial!

Vawiin tlai dar 3:00 hian Australia leh Sri Lanka an khel dawn a, zan dar 6:00-ah South Africa leh Afghanistan te an inhkhel bawk ang.

Champion lai Australia-in India laka an tlawm tih loh chu an la chak ve ve a, Sri Lanka lakah chak tura rinkai zawk an ni ang. Inelna ṭan hmaa champion rinkai zinga mi South Africa erawhin thilmak a thleng a nih loh chuan semifinal an thlen theih a rinawm ta lo a, an mualphona hliah khuh nan Afghanistan erawh an hneh ngei a ṭul ang.