Toronto Raptors-in Golden State rorelna titawp

Oracle Arena, Oakland-ah Golden State Warriors fans chu an stadium thlah tur leh an player au phur turin an ṭhu khat vek a, boruak sang leh danglam tak karah Toronto Raptors chuan NBA chanchin ziak danglamin a vawi khat nan an champion.

Nimin zing NBA Finals game 6 inkhelah Raptors hian 114-110 a hnehna changin, best of seven series chu 4-2 in an la. Raptors thiampuipa Kawhi Leonard chu NBA Finals Most Valuable Player atan thlan a ni nghal bawk.

Toronto head coach Nick Nurse chuan, "Thla 12 chhung chu mak tihna hlirin ka khat," tiin 1995-a din chauh team a champion pui thei chu mak a tih thu a sawi. MVP Leonard pawhin basketball a khelh chhan leh a thawmrim chhan a hmu leh ta tih a sawi ve bawk.

Toronto Raptors lamin game 5-ah point khat chauha an hniam zawk laiin 3 points an hlah a, nomawi an la nghak chhuak lo deuh. Game 6-ah erawh Golden State lam kutah point 1 a awm ve thung a, anni pawhin an chhawr ṭangkai thei bik chuang lo.

Hun tawp nan second 9.6 chiah a awm tawh a, Warriors lam 111-110 in an hniam mek. Raptors lam turn over vangin GSW ball chan hun a ni. Coach Steve Kerr-a'n time out lain chak theihna tur a ngaihtuah, a thu tlukna chu Stephen Curry-a 3 point shot neihtir a ni.

Golden State lamin vanneihna zawngin an thiampuipa Curry hnenah ball an pe a, American guard hi 3 point lut thei hmingthang ni mah se hun pawimawh vawr tawpah a hlah a, an beiseina a thamral zui bawk. An tihsual kal zelah Leonard-a'n point neih belhin an chak a nemnghet.

Toronto Raptors hian tun hma lamin regular season leh playoff pawh ṭha tak takin an khel tawh ṭhin a, an duh ber NBA nomawi erawh an la hlawh chhuak thei ngai lo - inkhel boruak sangah an player pawimawh leh innghahna ni ṭhinten beisei an phak loh fo vang a ni.

Kum 2018 khan San Antonio Spurs aṭangin Leonard an lalut a, Los Angeles tlangval hi an mamawh chhanna chu a ni. Kumin playoff bikah an mamawh hunah point pawimawh a nei thei a, season khat chhunga playoff game bika point nei hnem pathumna (726 points) a ni hial. A chungah hian Michael Jordan (756) leh Lebron James (748) te chiah an awm.

San Antonio Spurs tan 2014 khan Leonard hian NBA nomawi a chawi tawh a, hemi ṭum hian MVP atan thlan a ni. Kareem Abdul-Jabbar leh LeBron James te hnung zuiin club pahnih tana NBA Finals' Most Valuable Player (MVP) ni thei pathumna a ni a, Eastern leh Western Conference team pahnih tana ni kawp thei hmasa ber a ni.

Golden State Warriors hi NBA team ṭha an sawi apianga an hmaih ngai tawh loh tur an ni a, a zawna vawi hnih champion lai an nih bakah season hnuhnung palia ṭum thum nomawi chawi theih an nih avangin kuminah pawh rinkai ber an ni.

Mahse, Warriors hian an thiampuipa Kevin Durant chu hliam vangin an chhawr mumal thei lo, NBA Finals bikah phei chuan game 5-a rei lote an inlan bak a inkhel lo. Inkhel pawimawh tak game 6-ah Klay Thompson chu GSW player khel ṭha ber a ni a, ani pawh hi quarter thumna an khelh laiin a hliam ve leh bawk.

Warriors coach Steve Kerr chuan, "Inhliam hi chu NBA inkhelin a ken tel ve a ni a, a tuartu ni mah ila chhuanlam atana hman a ṭul lo. Durant hi a ke artui hliam vangin season thar tir lamah pawh a inkhel thei lo maithei, khup hliam vanga Klay chawlh chen tur pawh a chiang lo," a ti.

Warriors hian season tharah chuan pound maktaduai 789 zet senga sak Chase Center an luah tawh dawn a, San Francisco lama an insawn tawh dawn avangin tun ṭum game 6 hi Oracle Arena bika an match hnuhnung ber a ni.

Golden State player leh anmahni ṭantuten kum 47 zet a hman tawh, NBA team ten arena an hman lai zinga upa ber ni bawk hi hnehna chang chunga thlah an duh. Mahse, an tum leh beisei angin game 7 an nghak chhuak zo ta lo.

American forward Draymond Green chuan, "Team chhunga player awm zawng zawng ten kan theihna sang ber kan hlan, amaherawhchu tun ṭum atan chuan  a tawk zo lo a ni," tiin Raptors champion tur an dan zawh loh thu a sawi.