Australia-in Brazil an lehthal

FIFA Women's World Cup-ah Brazil-in Australia lakah 2-0 in hma hruai hman mah se Matildas (Australia hmeichhe team sawina) hian 3-2 in an lehthal.

Brazil hian kum 24 hnua a vawi khat nan group stage-ah hneh loh an tawng a, vanduai chuan knockout stage lut lo thei an ni. La Mosson-a inkhelah Brazil-in Marta penalty (27') leh Cristiane Rozeira (38') hmangin hma an hruai. Kum 33 mi Marta hian World Cup-ah goal 16 a khung ta a, a record siam sa chu a sawhnghet zel. Cristiane Rozeira hian tun ṭum inelnaah goal li khung ve tawh bawkin US forward Alex Morgan chiah goal khung tamah a tluk lo.

Australia beiseina siam turin first half injury time-ah Caitlin Foord-i'n siphurh a sut ṭhen a, Brazil captain Marta chu hliam vanga lakchhuah a nih zui avangin Matildas an phur sawt. Minute 58-naah Chloe Logarzo-i'n a khung belh a, 2-2 a ni.

A tawpa danglamna siamtu chu VAR a ni a, Brazil defender Monica Hickmann Alves-i'n an lamah a tauh lut. Minute 66-naa goal luh theih nan hian Sam Kerr inrawlh mah se VAR hmanga an enlet hnuah goal-ah pawm a ni ta zawk. Goal dang a lut tawh lo a, Australia-in Brazil 3-2  in an hneh.

Inkhel dangah China-in minute 40-naa Li Ying-a goal khung hmangin South Korea an hneh. Group B-ah hian Germany leh Spain an awm avangin China tan pahnihna nih phak a harsa dawn a, amaherawhchu last 16 lut tur pathumna tiṭha pali zingah erawh an inhlankai theih a rinawm.