Juve zawm turin Sarri chhuak dawn

Chelsea chuan an manager Maurizio Sarri chungchangah Juventus chu a thuphungin inremna an neihpui tawh. Italian manager hi contract nei lai a nih avangin Juve lamin zângnadawmna an pek ngai tur hi pound maktaduai nga vel zet a ni ang.

European club lian pahnihte hi Ningani tlai khan an inrem a, nizan lam kha chuan chiang zawka tarlan theih beisei a ni. He thu i chhiar meuh chuan Sarri-a'n Stamford Bridge aṭangin a mutbu a tel fel tawh tura ngaih a ni.

Kum 2003-a Russian sumdawng hausa Roman Abramovich-a'n Chelsea a lei hnuah manager an nghet ngai ta meuh lo, Sarri hi a chhuak leh a nih chuan mahni contract hmang zo loa Blues chhuahsantu manager pakuana chiah a ni ang.

Nikum July thla khan Sarri hian Napoli aṭangin Chelsea a zawm a, Italian manager hi tun hma lama nomawi la chawi ngai miah lo a ni mah se Serie A lamah ṭha takin team a kaihruai rei tawh a, attacking football hmuhnawm chhawp chhuak thei a nih avangin beiseina an nei sang.

Napoli aṭangin a player chuam bik Jorginho a chhawm lut bawk a, Premier League lamah pawh bul an ṭan fuh viau. Amaherawhchu, season laihawla an zuih avangin Manchester City leh Liverpool an tluk lo - a hmawr bawkna duhthusam ni lo mah se 2018 aia hma sawnin Champions League ticket a neihpui.

League Cup final-ah Man City chu penalty shootout-ah an hneh lo a, Europa League lamah erawh Arsenal sawp chungin nomawi an chawi thung. Season khat chhunga Sarri hnathawh hi sawi nep theih a ni lo.

Nomawi lian a chawi a, inkhel hmuhnawm a lantir bawk. Mahse London club-ah Sarri rilru a nghet lo. League Cup final-ah manto taka a keeper lakluh Kepa Arrizabalaga a thlak thei lo a, Europa League final an khelh hmain media lam hmuh theih turin an training-na hmun aṭangin thinrim takin a chhuak bawk.

Blues ṭantute zingah Italian manager ngaina lotu an tam a, an chetdan vanga sawiseltu an tam bawk. Boruak nuam lo tak kara a awm laiin Juventus an rawn lang a, an mahni ram lama team lian zawk enkawl châkna chuan Sarri a tilungleng a, season thum cham tura a contract ziahna chu kum khat hnu lekah a hnuchhawn.

Chelsea hi transfer vawi hnih chhung player thar lalut thei lo tura hrem lai an ni a, an hremna hi infiamna lama thubuai ngaihtuahtu sang Court of Arbitration for Sport (CAS) ah kinglet mah se a result a la hriat lo. Transfer boruak rit tak hi lang lo phena Sarri rilru inleh chhan pakhat a tling thei bawk.

An player neih ṭhat ber Eden Hazard chu Real Madrid lamah an chan a, nikum January thla a an lakluh Christian Pulisic-a'n rawn zawm ve dawn bawk mah se, United States international chauh hi nakkum nipui bazar thlen hmaa an player thar neih awmchhun a ni thei.

Player lei thei loa hremna kaltlang pui a nih chuan Chelsea enkawl hi thil awlsam a ni dawn lo a, manager tam tak tan chona leh thil châkawm tak ni bawk nachungin mahni lu chunga meiling chhek khawlna pakhat a ni thei bawk.

Tun dinhmunah chuan Blues enkawl thei zingah an midfielder hlui Frank Lampard, Ajax boss Erik ten Hag leh season hmasa lama Wolves chet ṭhatpuitu Nuno Espirito Santo te chu hming langsar an ni mek a, an manager hlui Jose Mourinho thlengin an sawi ri - hun rei lote chhungin a chiang thuai tura ngaih a ni.