U20 World Cup champion Ukraine

Ukraine chuan Inrinni zan khan South Korea 3-1 a lehthalin Under 20 World Cup-ah a vawi khat nan an champion.

Pathumna inchuhnaah Italy leh Ecuador te hun pangngaiah goal awm loin hun pangngaiah an inhnehtawk a, extra time-ah Richard Alexander Mina Caicedo-a'n South America ram tana goal awmchhun a khung.

Stadion Widzewa, Poland-ah South Korea-in best player atana thlan Lee kang-in penalty hmangin minute nganaah hma an hruai a, Asian team hian VAR ṭanpuinain penalty hi an hmu.

Goal an chhuah vangin Ukraine an talbuai duh lo a, tlarhnung aṭangin ball an inpe kual a, passing game an khel a. Ukraine manager Oleksandr Petrakov-a'n an team top scorer Danylo Sikan aia Dynamo Kiev striker Vladyslav Supriaha a thlang chu a tifuh tel bawk.

Supriaha hian final hmaa World Cup U20 match rukah goal khatmah a khung lo a, minute 34-naah a goal hmasa ber khungin second half-ah goal khat dang a khung belh bawk. Kum 19 Supriaha hi South Korea tlarhnung tan a hnawksak a, minute 62-naah Sikan-a'n a rawn thlak. Korea hian 2-1 a nih laiin siphurh sutna hun ṭha an nei a, Lee Jae-ik ball tauh chu Ukraine keeper Andriy Lunin-a'n ṭha zetin a dang.

Minute 89-naah Heorhiy Tsitaishvili-a'n Ukraine chak nemnghehna goal a khung avangin South Korea beiseina a thamral a, 3-1 in inkhel a tawp.

Inelna hi tun hmain FIFA World Youth Championship tih an ni ṭhin a, Under 20 World Cup tih a nih hnuah vawi hnih champion an la awm lo.

Ukraine-in no­mawi an chawi hma hian England (2017), Serbia (2015) leh France (2013) te an champion a, Europe-in inelna an thunun. Tun ṭumah hian 2017 champion England an inlan lo a, a chhan chu playoff-ah Norway an hneh lo.

FIFA U20 World Cup hi 2021-ah neih a ni dawn a, a thlengtu tur hi 23 October 2019-a Shanghai, China-a FIFA Council neih hunah tihchian a ni ang.