Lionel Messi hoin Argentina an tlawm

Argentina chuan Copa America-a an group match hmasa berah Colombia 0-2 in an ngam lo. Inelna hnuhnung pahniha final lut thei Lionel Messi te ram hian Ningani zingah Paraguay an hmachhawn leh ang.

Inelna thlengtu Brazil chuan Inrinni zing khan match hmasa ber khelin Bolivia 3-0 in an sawp, star player Neymar awm lo pawhin world champion vawi nga ni tawh hian goal khung kawngah harsatna an nei lo.

Nimin zing Fonte Nova Arena-a inkhelah Colombia tan Roger Martinez leh Duvan Zapata ten hun tawp dawn lam minute 20 chauh a awm tawhah goal an khung a, 1999 hnua a vawi khat nan Copa America-ah Argentina an hneh.

Real Madrid manager hlui Carlos Quieroz-a'n Argentina hlauhawm zia a hriat avangin a tlarhnung lam a rem khawm uluk a, ball chang tlem mah se a pawiti lo. Hun tawp dawnah nawr let ve chauhin, substitute Martinez chuan mual sir vei lam aṭanga ball lalutin minute 71-naah na takin goal-ah a pet lut. Corner aṭanga fing taka bell pet chhuaktu James Rodriguez fak hmaih a thiang lo ang.

Goal an neih hnuah captain Radamel Falcao la chhuakin Zapata dahluh a ni. Season hmasa Serie A club Atalanta tana goal 23 khunga Champions League khelh pui tur hian hnai tak aṭangin an goal hnihna leh chak nemnghehna ni bawk a khung.

Colombia coach Queiroz chuan, "Colombia tana khelte khan an hna thawh dan tur dik tak an hria a, kan khingpuiin ball an chan chiah khan na takin kan chuh nghal zel. Player tin an khel ṭha vek a, a khaikhawmna awlsam chu Argentina aia khel ṭha zawk kan ni," tiin a naute a dahsang hle.

Argentina-in beisei loh danin inelna bul an ṭan a, captain Lionel Messi chuan chak loh chu an tan a nat thu a sawi. Copa America vawi 14 champion tawh hian 1993 hnu lama nomawi chawi an tum lehna chu rinhlehnain a khat mek.

Colombia lakah Sergio Aguero-a'n hun ṭha nei mah se keeper David Ospina a rawn tlanchhuah ran em avangin a pet goal hman lo. Goal khung loa an inhnehtawk laiin Manchester City defender Nicolas Otamendi-a tauh keeper dan per let chu Messi-a'n hnai tak aṭangin a tauh lut lo.

Kum 31 mi Messi chuan, "Hetianga bul ṭan hi kan duh dan a ni lo, a na kan ti hle. Mahse, inelna bul kan ṭan chauh a ni a, lungngaia indawm kun mai loin a êng lam kan thlir tur a ni ang," tiin group stage paltlang thei turah a la inngai.

Barcelona thiampuipa chuan sawi chhunzawmin, "Chak lo chunga bul ṭan chuan hmabak a hautak tawh hle tih pawh kan hria, chutih rualin kan hma hun hi kan kuta innghat vek a la ni tih pawh kan hre bawk. Tun ang result hi chu a thlen nawn tawh loh ka beisei," a ti.

Copa America inbuatsaihna friendly match-ah Neymar a inhliam a, footballer manto ber hi Brazil coach Tite-a'n a hmun ruak hnawh khah a harsat tur thu sawi mah se Bolivia lakah erawh harsatna an nei lo.

Inelna thlengtu Brazil hian an khawpui pakhat Sao Paulo-a inkhelah first half-ah goal khung lo mah se, inkhel chawhnu lamah Barcelona forward Philippe Coutinho-a'n goal hnih a khung bakah forward Everton Soares chuan goal khat a thawh ve bawk.

Kum 56 mi Tite chuan, "Fans lam beisei angin kan khel chhuak nghal mai lo tih ka hria, min au el pawh ni se an demawm loh. Amaherawhchu player naupang leh tawnhriat nei tlem deuh kan kawl hnem a, anni hian insiamrem turin hun an mamawh a ni. Second half kan inkhel kha chu sawiselna tur a tam lo khawp ang," a ti.

Bolivia laka goal an khung mai loh avangin Tite naute inkhel entu 46,342 zinga ṭhahnem tak chuan an lungawi loh zia an au chhuah pui hman. Mahse, Coutinho-a'n tun tournament bika goal hmasa ber penalty aṭanga a khung hnuah erawh an hmuh duh attacking football hmuhnawm an hmu chhunzawm.

Brazil hian 1989 hnua a vawi khat nan Copa America an thleng a, tun ṭumah hian South American team 10 an inlan kim. Khawmualpui dang aṭanga sawm an nihna angin Qatar leh Japan an inlan bawk. Group A inkhel dangah Peru leh Venezuela ten goal awm loa an inhneh-tawk avangin point thum hmutu Brazil chu hmahruaitu an ni a, an match lehpek atan Nilaini zing hian Venezuela nen an inhmachhawn leh ang.

Brazil    3 - 0    Bolivia

BRA : Coutinho 50' (P), 53'; Everton Soares 85'

Argentina    0 - 2    Colombia

COL : Martínez 71'; Zapata 86'

Venezuela    0 - 0    Peru

Japan    04:30 AM    Chile