Siami telna India an chak nawn

Ram leh ram hmeichhe hockey hmanga inelna Women's FIH Series Finals khelh mekah India chuan pool match vawi hnih an khelhah hnehna an chang ve ve a, Mizo tleirawl Lalremsiami Hmar chu player pawimawh a ni.

Inrinni khan India hian an match hmasa zawkah Uruguay 4-1 in an hneh a, Hiroshima-a inkhela goal hnuhnung ber hi Siami khung a ni. Nimin khan Poland nen an inkhel zui leh a, harsa lo takin 5-0 in hnehna an chang nawn - Pool A hmahruaitu an ni nghal bawk.

India hi Pool A-ah Poland, Uruguay leh Fiji te nen an awmkhawm a, pool match hnuhnung ber atan June 18, Thawhlehni hian Fiji nen an inkhel zui leh ang. Pool A leh B te hi an mahni awmna pool ṭheuh a mi an inkhelh kual hnuah a sang pahnihten second round an lut dawn.

Kolasib tleirawl Siami chuan, "Kan beisei aiin kan khel ṭha, tun ṭum inelna hi ka ngai pawimawh. Olympic khel thura rahbi hmasa a nih avangin theih tawp kan chhuah, match lehpekah pawh Pathian zarah hnehna kan chan leh ka beisei," tiin Vanglaini a hrilh.

India hi Hiroshima-a inelna nei team pariat zinga pakhat an ni. Anni ang tho hian Banbridge, Northern Ireland lamah team pariat tho an inel ve bawk, group aṭanga a ti ṭha pahnih ten 2019 FIH Olympic Qualifiers an khelh dawn avangin ram dang pawhin inelna hi an ngai pawimawh hle a ni.