UEFA-in league ti tawp lo turin club a ngen
Europe-a football thuneitu sang ber UEFA chuan thuchhuah siamin European football club-te chu Covid-19 vangin league khelh theih rih loh mah se league ti tawp lo turin an ngen a, league ti tawp te chu season thara Champions League leh Europa League-a an dinhmun tur a buai phah theih thu an hrilh.
UEFA chuan season kal mek chu July emaw August-a khelh zawh hman tura ruahmanna kalpui a nih thu an sawi a, UEFA hnuaia inelna pahnih Champions League leh Europa League pawh chhunzawm theih an beisei - inelna pahnih hian last 16 an la khel zo lo ve ve.
European Club Association leh European League-te nena thuchhuah inṭawm an siamah UEFA chuan, "UEFA hnuaia club competition hi khelmual chhunga result aṭanga teh a nih ṭhin avangin hma taka league tihtawp mai hian season thara UEFA club competition-a tel dan tur a ti buai thei a ni.
"Football kan khelh leh theih thuai kan beisei a, tunah hian July leh August-a league khelh zawh theih dan tur buaipui mek a ni. Chumi zawhah chuan UEFA competitions pawh khelh chhunzawm a ni ang," an ti a, May thla laihawlah chuan ruahmanna puanzar theih an inbeisei.
UEFA thu chhuak thar ber aṭanga a lan dan chuan European football-a league lian zualte chu tawpsan mai an nih a rinawm lo a, Liverpool fan-te tan pawh lawma nuihna tur a awm ve leh ṭan niin a lang.
Belgian Pro League erawh UEFA-in thuchhuah an siam hma hian tun season atan tihtawp a nih thu puan a lo ni tawh.