Chetsualna karah Marquez a chak

Marc Marquez chuan 2019 MotoGP world championship hmahruaitu a nihna a nemnghet chhunzawm zel a, a teammate Jorge Lorenzo erawh a tluk bakah Andrea Dovizioso, Valentino Rossi leh Maverick Vinales te inelna a tihtawp sak bawk.

Honda rider Marquez hi lap hnihnaa chetsualna thlengah a him hlauh a, pole aṭanga bul ṭantu Fabio Quartararo-a'n bul a ṭan fuh tawk loh bawk avangin Pathiannia intlansiakah Spanish rider Marquez tan hnehna chang turin harsatna a awm lo. Tun season intlansiak pasarih awm tawhah a vawi li nan pakhatna a ni.

Catalunya circuit-a intlansiakah tluang takin lap hmasa ber an tlan zo, lap hnihna turn 10 an thlen chuan vawi thum champion tawh Lorenzo chu chiang zetin a tlu a, a tleng zui avangin a sira awm leh a hnunga awm rider pathum - Dovizioso, Rossi leh Vinales te chu tlan chhunzawm thei lo turin harsatna a siamsak bawk.

Honda rider Lorenzo chuan, "Andrea, Maverick leh Valentino te pawi ka khawih tih ka hria, anni hi champion tuma inum lai an nih avangin a pawi ka ti takzet. An tan chhiatna ka thlen sak a ni," tiin a elpui team dang Ducati leh Yamaha rider pawi a khawih avangin a inthliam loh thu a sawi.

Yamaha rider Rossi-a'n Catalunya MotoGP-ah pangana aṭangin bul a ṭan a, tun season bika bul a ṭan hma ber ṭum a ni. Beiseina nei sang mah se Lorenzo vangin a tum ram a thleng thei lo. Italian tlangval chuan, "Bike a ṭha tawk a, intlansiak hma kha chuan boruak engkim mai kha kei leh ka team tan a fuh em em vek.

"Mahse, ka hmaa awm Danilo Petrucci ka tlan pelh hun kha a fuh lo a ni. Vanduainaah ka inbarh lut a, bike in min chilh avangin ka ke rek a na bawk. Tunah chuan kar khat chhung kan dinhmun enfiah nan chawlh kan nei anga, a hnuah Assen lam kan hawi ang," a ti.

Fabio Quartararo chu a ban na zai a nih aṭanga ni 11 hnu lekah hmuhnawm khawpin a tlan thei nghal a, French rider hi qualifier-ah a tlan ṭha ber. Intlansiakna takah erawh kum 20 mi hi a ruh a la no deuh - pakhatna Marquez a phak lohna chu 2.99 sec a ni.

Hnehna chang zo lo mah se Yamaha rider hi tun hnaiah MotoGP ti hmuhnawmtu zingah a tel phak der tawh. World champion vawi nga ni tawh Marquez ropuina ṭhenkhat chhuhsak thei tura ngai pawh an awm tawh hial, inelna hmuhnawm kan hmu chhunzawm zel dawn tih a chiang.

Honda rider Marquez chuan, "Midang vanduai karah hnehna ka chang hlauh hi ka vannei hle. Mipui tam zawk chuan Lorenzo chet dan kha atthlak an ti mai thei. Mahse, ngun takin an chetsual dan kha en ila, a hnunga awm Maverick Vinales khan kawng ken a tum zawk a ni, a hnu lama thil thleng kha chu vanduai vang chauh a ni zawk. Tihsual chu a nei ngei a, tih luih erawh a ni lo," tiin a teammate thlavang a hauh.

Tun season MotoGP hi intlansiak 19 a awm dawn a, chung zinga pasarih an tlan tawh. Tun thla tawp hian Assen, Netherlands-ah inelna an neih chhunzawm leh dawn, intlansiak hmabak a la tam avangin champion tur sawi lawk a la harsa. Point 37 zeta hmahruaitu Marquez pawh rider dang tan tlan pelh theih a la ni.