Stuttgart Open champion Berrettini

Pathianni zan Stuttgart Open mipa singles final-ah Matteo Berrettini chuan Felix Auger-Aliassime hnehin nomawi a chawi a, Italian tlangval hian a beisei aia ṭhain Wimbledon inbuatsaihna hun a hmang.

Germany rama final khelhah hian world number 30 Berrettini hian set hnihna an khelh laiin a khingpuiin set point nga ngawt a nei hman a, chutichung chuan 6-4, 7-6(11) in hnehna a chang. Italian tennis player hian ATP Tour title pathum a la tling ve ta.

Kum 23 mi Berrettini chuan, "Tun season chhunga grass court inelna ka hmachhawn hmasak ber a ni a, rinkai lo zawk ni chunga kei aia player ṭha ka hneh thei hi ka lawm," a ti. Nomawi chawi tur hian match nga a khelhah set hloh miah loin a tlang vek a ni.

Season hmasa khan Novak Djokovic (Shanghai Masters) leh Alexander Zverev (Madrid Open) ten an mahni service hloh miah loin nomawi an chawi thei a, kuminah chuan Berrettini hi service hloh loa title la leh thei hmasa ber a ni. Stuttgart Open-ah hian a service vawi 50 chu a la vek.