Lakers-in Davis la turin 'risk' la

NBA trade history-a ngaihnawm ber zinga mi tih theih turin LA Lakers chuan Anthony Davis an lalut. Amaherawhchu, Lakers hian an player duh tak la tur hian New Orleans Pelicans hnenah Lonzo Ball, Brandon Ingram, Josh Hart, 2019 NBA draft-a no. 4 pick bakah pick dang neuh neuh an pe let thung.

NBA club pahnih hi June 15, 2019 khan inrem tawh mah se July 6-ah Davis hi official-in Lakers player a ni chauh dawn. Kum 26 mi Anthony Davis hian 2012 khan NCAA-ah Kentucky Wildcats a champion pui a, Most Outsanding Player atan an thlang. Hemi kum vek hian NBA Draft-ah no. 1 pick a ni a, New Orleans Pelicans-in an thlang.

Kum 2017 NBA All-Star Game MVP Award dawngtu Anthony Davis hi NBA All-Star-ah vawi ruk a tel tawh a, All-NBA First Team leh NBA All-Defensive Teams-ah vawi thum ve ve thlan a ni tawh. Team USA pawh 2012 Summer Olympics khan gold medal a lakpui a, nikum season khan regular season-ah chawhrualin 25.9 pts a nei pha bawk.

Lakers hian 6ft 10in-a sang Davis hi an ṭhatpui dawn tih a hriat a, season liam taa LeBron James an nei chunga playoff an khelh phak loh avangin danglamna thlen thei player hi an mamawh tak pawh a ni. 

Amaherawhchu, New Orleans Pelicans pawhin Lonzo Ball leh Brandon Ingram te an neih thung avangin an channa hi hlawkna tiin an chhal theih a, NBA draft-a no. 4 pick an hman ṭangkai bawk chuan season thar ni loin kum thum hnuah chuan team ṭha tak an ni thei dawn.

NBA draft hi NBA team ten college aṭanga player chhuak ṭha an lakna hun a ni a, awmze neiin an inthlan chhawk ṭhin. Kumin hian June 20-ah Barclays Center, New York-ah NBA Draft hi neih a ni dawn. Pelicans hian kumin aṭanga NBA Draft-a kalphung thar an hman chu an vanneihpui a, team hnuai zawkte duhsak nan first pick chu pawh niin an chang fuh. Hei vang hian college aṭanga player chhuak thar ṭha ber chu Pelicans hian an chang fuh thei dawn a, Lakers-in an pek tak avangin palinaah an la thlang thei dawn bawk.

NBA Draft-a number 1 pick ni tawh player langsarte chu Larry Johnson, Shaquille O'Neal, Allen Iverson, Tim Duncan, Yao Ming, LeBron James leh Derrick Rose te an ni a. Lakers-in Anthony Davis la tura player ṭha baka 2019 NBA draft-a no. 4 pick an pe tel hi risk an la sang hle.