MFA khelmualah bungrua thleng mek

Sairang Dinthar-a MFA khelmual siam chhoh mek chu tun aṭanga rei loteah phullem phah a ni tawh dawn. Nimin khan phullem phahna tur hmanruate thleng ṭanin tunkar chho hian bungruate a rawn thlen fel beisei a ni.

Khawvela football thuneitu sang ber FIFA-in India rama Pilot Project paruk (6) a kalpui zinga a telh, kum 2015-a a lo tiam tawh - Sairang Dinthar field-a artificial grass phah tura hmalakna chu tihhlawhtlin a ni ṭep. Tunah hian phullem phahna tur zawl zau tak, a dung meter 120, a vang metre 80 zeta zaua laih zawh tawh a ni a, chumi chhungah chuan football field (meter 68x105 a zau in) phullem chu phah a ni dawn a ni.

Phullem hi FIFA pawmpui Edel Grass, Netherlands company-in a phah dawn a, bungraw chitin mai tuipuiral (Netherlands) aṭangin an chahlut. Dutch engineer-ten tun atanga rei loteah phullem hi an phah ṭan dawn a ni. Sairang Dinthar-a MFA khelmualah hian a hungna mumal tak siam a ni dawn a, MFA chuan a kiangah hostel leh floodlights dah theihna turte a hisap lawk bawk a, kumin favang chhovah a khelmual ngau ngau hi hman theiha peih fel an tum a ni.

Kum 2017 khan India chuan FIFA Under 17 World Cup a thleng a, a thlen hma kum hnih a la awm tih, kum 2015-ah khan South Asia a FIFA Regional Development Officer Dr. Shaji Prabhakaran leh AIFF a hotu ṭhenkhatte chuan Mizoram football dinhmun an rawn zir chiang a. Sorkar hotu lu ber berte rawn kawmin, football a inhnawmhnawih mi tam tak - coach te, team neitute leh Football hruaitute an kawm a. Mizoram-in kum 3/4 vel kal ta aṭanga hma a sawn chhoh dan te chipchiar takin an rawn zir a ni. 

Mizoram Football hmasawn chhoh dan leh inkaihhruai danah an mit a tlung hle a, Mizoram FA chu ṭanpuina pek tlakah an ngai a, India rama FIFA Pilot Project-ah Mizoram chu an telh ta a ni.