India-in Pakistan lakah hnehna hlado an chham

Indopui III-na ang hiala an sawi India leh Pakistan inkhel chu Pathianni khan Old Trafford, Manchester-ah khelh a ni a, Virat Kohli hote run 89-in an chak.

Men in Blue tan opener Rohit Sharma chuan run 140 zet a vuakchhuah bakah Kohli-a'n run 77 siam bawkin over 50-ah run 336-5 an siam phak avangin ṭan phat aṭangin chak tur khelhin an khel a, team ṭha zawk an nih zia rinhlelh tur reng a awm lo.

Ruahsur vanga inkhel an khaihlak hlek a, DLS method hman niin Pakistan hian over 40-ah run 212-6 an siam a, India-in World Cup bika vawi sarih an hmachhawnah an hneh vek.

Inkhel enna ticket diltu 700,000 an awm a, media lam aṭang pawhin dilna 600 zet an awm. Old Trafford-ah erawh entu 23,500 chauh an leng a, stadium khat tlat pungkhawmin kawr pawl karah kawr hring hmuh tur a awm.

TV lam aṭangin tluklehdingawn khat chuangin an en bawk a, inkhel boruak a sang. Chutihrualin khelmual boruak erawh a dang a, infiamna ropuina a lang - ram inhal tak inkhel entute hian chak duh siin hlim takin inkhel an en ho.

Kum 32 mi Rohit Sharma chuan 50 siam turin ball 34 chiah a mamawh a, century siam turin ball 85 chiah a hmang. India-in bul an ṭan ṭha a, Rohit leh Shikhar Dhawan aiawhtu KL Rahul ten run 136 an siam a, Pakistan laka India partnership ṭhat ber ṭum a ni.

Pakistan cricket legend leh prime minister Imran Khan chuan bat hmasak thlang turin an ram team thurawn a pe a, Rohit leh Rahul ten run an siam mawlh mawlh avangin captain Sarfaraz Ahmed-a'n an ram hruaitu thurawn pawm loa vawm hmasak a thlang chu a inchhir khawp ang.

Rohit hian run 140 siamin Indian zinga Pakistan laka match zawna century siam hmasa ber a ni a, nikum khan Asia Cup-ah thi loin run 111 a siam a ni.

KL Rahul aiah Virat Kohli a rawn inlar a, Pakistan bowler tan mangchhia a rawn thlen. India captain hian 222 innings lekah ODI run 11000 a siam tling der a, record dinglai Sachin Tendulkar-a siam 276 innings chu a khum chiang hle.

Kohli hian 8000 (175), 9000 (194) leh 10000 (205) ODI siam turin innings mamawh tlem ber a ni tawh bawk a, Pakistan lakah hian run 77 siamin vanduai takin thi lo se run tam zawk a siam thei ang. India hian over 50-ah run 336 an siam a, Pakistan laka target an siam tam ber ṭum a ni.

Pakistan-in chak turin over khatah run 6.74 zel siam an mamawh a, chutichung chuan over hmasa 10-ah four run vawi ruk chiah an vaw chhuak a, engtik lai mahin chak an hnaih lo.

Shikhar Dhawan awm loh vanga lut Vijay Shankar chu wicket la hmasa ber a ni a, a khat mawi tawkin India bowler ten wicket an la zui. Ruah surin inkhel entu a hnawt kiang a, hun tawp lamah phei chuan stadium chanve vel chauhin an en tawh.

DLS method hman a ni a, Pakistan target chu over 40-ah 302-ah siam rem ni mah se 212/6 chiah an vaw chhuak a, run 89-in India an chak