Fed Cup final khelhna tur chu Perth

Ram leh ram hmeichhe tennis team hmanga inelna Fed Cup khelhna tur tih chian a ni a, November 9-10 chhung hian Australia ram chhim lama khawpui pakhat Perth-ah Australia leh France te an inkhel ang.

Kum 1978 khan Perth hian Fed Cup final hi a lo thleng tawh bawk, kuminah an mahni rama inelna hmachhawn tur Australia nulate tan nomawi chawi theihna hun a inhawng ṭha dawn tihna a ni.

Australia Fed Cup captain Alicia Molik chuan, "Kan player pui Ashleigh Barty-i'n French Open nomawi a chawi hnu lawkah Fed Cup final khelhna tur chu Perth a nih thu kan hre leh a, hun rei lote chungin tennis chanchin ṭha pahnih kan hria tihna a ni," a ti.