Gerrard-a Rangers an champion55

Liverpool legend Steven Gerrard-a'n player a nih laiin league nomawi chawi lo mah se manager a nih hnuah a vawi khat nan league-ah a champion ve ta a, kum 10 zet champion tawh lo Rangers chu Scottish Premiership-ah manager ni chungin a champion pui. 

Rangers hian Inrinni khan St Mirren chu 3-0 in an hneh a, he result avang hian league champion ni turin point khat chiah an mamawh.

Pathianni zanah Rangers hnaih bertu Celtic chu Dundee United (0-0) mualah an chak zo lo a, Rangers hi umphak theih an nih tak loh avangin an champion.

Glasgow club-in nomawi an chawi tak avangin season 10 chhung a zawna Celtic champion beiseina chu an tihtawpsak a, Scottish football-ah chuan Gerrard-a hming lo chu a leng meuh rih lo. 

Rangers hi 2011-12 season khan sum lama an talbuai avangin fourth division-ah an tla thla a, kum nga liam ta khan top division khel turin an kir ve leh thei chauh - kum 2018-ah Gerrard-a'n a enkawl ṭan a, hetihlaia Liverpool Captain hlui hmabak chu engmah lo aṭanga team din thar a  ni. 

English coach hi Rangers board lamin team a dinthar chhungin a chungah rinna an nghat a, kum 2021-a herchhuah meuh chuan league champion an ni leh ta - a vawi 55-nana league nomawi an chawina kawngah match 32 khel tawhin tlawm an nei lo a, match ruk khelh tur an la nei bawk. 

Rangers hian vawi 28 an khingpui an hneh a, vawi li an draw - hetih chhung hian goal 77 an khung a, an lamah goal kua chiah a lut! 

Gerrard-a hnathawh hi 'Scottish Premiership alawm' tia sawi nep theih a ni lo a, Europa League last 16 an luhna kawngah pawh Willem II, Galatasaray, Standard Liege, Lech Poznan, Royal Antwerp leh Benfica hmachhawnin tlawm an nei lo. 

Rangers manager Gerrard chuan, "Thua sawi fiah a harsa zawk hial a ni. Ka rilru a hlimin nuam ka ti takzet a, he zinkawng hi tah hian a la tawp mai dawn lo. Nomawi tam zawk kan la rawn hawn ang. 

"Hnehna ropui tak kan chang a, ka tan chuan hlawhtlinna chan zawha pawimawh ber chu 'Enge kan hmachhawp?' tih hi a ni. Ka player-te ka chhuang takzet a, he club chhungkuaa pawimawh ber an ni. 

"Mahse, fan-te hlutna hi sawi nep theih a ni lo - he club dintu chu anni hi an ni a, kan nomawi hi an tan a ni. Chauh chang awm mah se tunah zawng sang takah kan awm ta," a ti a, fan-te tan an champion chu a hlan .

Rangers-in champion ni chunga league-a an hmachhawn leh hmasak ber tur chu an hmelma kumhlun Celtic an ni a, March 21 zana an hmachhawn tur club hi tun season league match vawi hnih an inhmachhawn tawhah an la hneh ve ve.