Chhara dinhmun a chiang lo

Indian Super League semifinal second leg-ah zanin dar 7:30 hian ATK Mohun Bagan chuan NorthEast United an mikhual dawn a, Mizo tlangval Rochharzela inlan theih dawn leh dawn loh a la chiang lo. 

Chhara hian hliam vangin league match hnuhnung pahnih leh semifinal first leg a khel thei lo tawh a, Chhinga Veng tlangval hian zanina a dinhmun tur sawichian theih a la nih loh thu a sawi. 

Aizawl FC forward hlui chuan, "Ka ke rekah hliam ka nei a, a tirah chuan ka hliam hi grade 3 a nih avangin thla thum/li vel chawl tura ngaih ka ni. Mahse, Pathian zarah ka dam chak a, March 3 aṭang khan training ka zawm leh tawh. 

"Hetihrual hian coach-in risk lak a la ngam loh avangin chawl hahdam rih turin min ti a, second leg-a ka dinhmun tur pawh sawi theih a la ni lo," tiin Vanglaini a hrilh - Chhara hian tun season ISL-ah match 12 khelin goal khat a khung a, assist vawi hnih a nei. 

Chhara bakah midfielder Lalengmawia (Apuia), Lalrempuia Fanai leh striker Lalkhawpuimawia-te chu Highlander squad-a Mizo awm an ni a, semifinal first leg-ah Bagan nen hian 1-1 in an inhnehtawk - away goal rule hman a nih loh avangin tlang tur zawk sawi thiam a harsa hle. 

Nizan khan semifinal dangah Mumbai City leh FC Goa an inhmachhawn a, first leg-a 2-2 a inhnehtawk team pahnih result hi kan hre hman lo.