Spurs tan Bale leh Kane

Tottenham Hotspur sawi chuan Harry Kane leh Son Heung-min hming a lang nghal ṭhin a, Pathianni zanah erawh Kane leh Gareth Bale hming sawi kawp a ni ta thung. Khawvel player manto ber pawh ni tawh Bale-a'n chuai lam a pan ti ṭhin mah se theihna Crystal Palace lakah theihna a la neih san zia a lang.

Pathianni zana Tottenham Hotspur Stadium-a inkhelah Bale leh Harry Kane ten goal hnih ve ve an khung a, Palace tan Christian Benteke-a'n goal khat a khung ve bawk. Jose Mourinho hote hian match 27 aṭangin point 45 an hmu a, table-ah paruknaah awmin Champions League khelh beiseina an nei thar leh ta bawk.

Kum 31 mi Bale-a'n Spurs tana match hnuhnung pathumah goal thum a khung a, Palace nen pawh hian ṭan phat aṭangin a hmuhnawm nghal. Minute rukna lekah Bale-a'n Palace player pahnih karah ball la chhuakin a ball cross ṭha tak chu Son-a'n keeper zawnah a tauh.

Minute 25-naah Palace defender tihsual chu Harry Kane-a'n a hmang ṭangkai a, English striker cross ṭha zet chu awmna hmun tur taka awm Bale-a'n goal-ah a chantir. Amaherawhchu first half injury time-ah Christian Benteke-a'n ṭha zetin a tauh goal a, halftime-ah 1-1 a ni.

Second half-ah Bale a rawn langsar leh nghal a, minute 49-naah Welsh forward hian mual sira awm Sergio Reguilon-a pe a, Spanish left back cross chu Kane-a'n tauh letin Bale-a'n hmahruaina goal a tauh lut. Spurs ṭantuten tun hmaa an fachuam Bale kha an hmu leh ta a, tuna an fachuam Kane nen an inkawp rem bawk.

Harry Kane a langsar zui a, full-back Matt Doherty pass chu England striker hian mawi zetin minute 52-naah a khung. Asian tlangval Son-a pawh a awm mai mai lo a, South Korean forward hian minute 76-naah Kane-a goal khung tur hi a siamsak leh bawk.

Spurs tan Lucas Moura, Son, Kane leh Bale te an khel ṭha a, manager Jose Mourinho pawh a hlim. Portuguese manager chuan, "Goal ṭha kan khung a, football hmuhnawm kan khel.

Ka player-te rilru puthmangah ka lawm. League match hnuhnung pathum aṭangin point kua kan hmu a, inhliam kan nei lo," tiin tun hnaia an result-ah a lawm thu a sawi.

Spurs hian tun season-a inelna hrang hrangah goal 100 an khung tling chiah a, Europe-a league sang panga zingah tun season-a goal 100 khung thei pahnihna an ni a, German champion Bayern Munich-in (106) goal 100 an khung tling tawh bawk.