Ronaldo tan goal khung a ngai

Juventus-in Cristiano Ronaldo an lakluh chhan chu Champions League nomawi chawi an duh vang a ni. Old Lady hi last 16 aṭanga tla thei dinhmunah an ding mek a, zanin dar 1:30 hian Porto an mikhual ang.

An intawn hmasakah Portuguese club hi 2-1 in an chak. Italian champion tan tlang tur chuan Allianz Stadium-ah goal khung ngei ngei a ngai tihna a ni, kar tawpa chawlhna hun an pek Ronaldo chungah mawhphurhna a lian dawn.

Juve hian Inrinni zan khan Laizo 3-1 in an hneh a, league match an khelh ṭum hian Ronaldo chu bench lamah dah a ni. Andrea Pirlo-a'n a forward hi 100%-in a inpeih lo niin a sawi zet a, a hnuah erawh UCL khel tura chawlhtir a nih thu a sawi thung.

Italian manager Pirlo chuan, "Ronaldo hi tleirawl a ni tawh lo, tun hnaiah a zawnin match riat a khelh avangin chawlh a mamawh. Season kal laiah goal 20 a khung tling tawh a, ani tan chuan goal khung hi thil pangngai a ni," tiin Porto laka goal khung turin a ringtawk.

Champions League knock out stage chin bikah chuan Juve hian an muala match an khelh hnuhnung 12-ah vawi hnih chauh chak loh an nei. An ngam loh hi kha tih laia Ronaldo awmna Real Madrid (2018) leh Ajax (2019) an ni a, zaninah chak an tum ang.

Juve hi tlang tura rinkai an ni, amaherawhchu tun hnaiah UCL-ah an hlawhtling tawk lo. Porto lam tan tlang turin goal venhim a tawk tawh a, khulmualah goal an nei theih hlauh a nih phei chuan an dinhmun a ṭha leh zual dawn a ni.

Hliam leh hrileng vangin Leonardo Bonucci, Paulo Dybala, Giorgio Chiellini, Matthijs de Ligt leh Rodrigo Bentancur te dinhmun a chiang lo mek, coach Pirlo tan luhaina tham a tling. Chutih rualin Poto lamah pawh tlarhnung lama an rinrawl Pepe chu a dinhmun a chiang bik lo.