Milan-in Inter an um zel

Serie A champion tur a la chiang thei bik lo. AC Milan chuan Hellas Verona 2-0 a hnehin hmahruaitu Inter Milan an um ve zel. Milan club pahnih inkarah point thum chauh a awm, Inter-in match khatin an khel tlem thung.

Pathianni zan inkhelah Milan lamin an goal khung hnem ber Zlatan Ibrahimovic an chhawr thei lo a, Swede striker awm lo mah se goal khung kawngah harsatna an tawk lo - Rade Krunic leh Manchester United aṭanga an hawh Diogo Dalot te goal hmangin an chak.

Ibra hi tihrawl hliam vangin a chawl mek a, Ningani zana Man United nen Europa League last 16 first leg an khelh hun atan a dinhmun a chiang lo, manager Stefano Pioli erawhin chhawr theih ngei a beisei.

Milan coach Pioli chuan, "A dinhmun a ṭha zel, endik nawn leh a ni dawn a, United a hmachhawn theih ka beisei," tiin Ibra chungchang a sawi a, league bakah European football huanga hlawhtlin an duh thu a sawi bawk.