Doha-ah Kvitova a champion

Hun rei tak chhung nomawi a chawi loh hnuah Petra Kvitova a champion ve leh ta. Kvitova hian a khingpui Garbine Muguruza chu darkar khat leh minute thum chhungin 6-2, 6-1 a hnehin Qatar Open nomawi a chawi.

Wimbledon vawi hnih champion tawh hian nomawi a chawi hnuhnung zawk chu 2019 April thla daih tawh kha niin, a kut a awl rei hle. Tournament a hmachhawn zawng zawngah final vawi 38 a lut tawh a, vawi 28 zet title a la tawh.

Kum 31 mi Kvitova chuan, "Nikum khan nomawi chawi lo mah ila season duhawm tak ka hmang tho a, kuminah a rah chhuah chu a rawn lang ta. Kuminah hian hlawhtlinna dangin min zui ngei ka beisei," a ti.