MSL6 Finals Zaninah Zarkawt BCA vs Khatla TBL
Tualchhung basketball inelna lian leh ngaihhlut Mizoram Super League season 6 chu zanin dar 7:30 hian final game 1 khelh a ni dawn. Champion lai Zarkawt BCA leh sulhnu nei ṭha Khatla TBL ten chungnung zawk nih an inchuh dawn.
Hawla Indoor Stadium, Republic Vengthlangah final hi khelh a ni dawn, hrileng vangin a hmunah entu an awm thei dawn lo. Zonet Rihnim leh Zonet YouTube lamah live a tih chhuah a ni ang. Tlaiah MSL7 khel tur zawnna playoff khelh hmasak a ni ang.
Ropui zawk
MSL hi vawi nga khelh a ni tawh, a hmasa pahnihah tuma chuh buai phak lohin Khatla TBL an champion. Mission Veng Vikings an inlar zuai a, chumi hnuahah erawh Zarkawt BCA chu tun hnai season hnih chhung roreltu an ni thung.
TBL leh BCA ten record an nei ṭha a, vawi hnih ve ve an champion tawh. Kuminah hian a chak zawk chuan mellung pawimawh an phun dawn. India ram pawn aṭanga an player ziahluh te inlan thei dawn lo mah se tualchhung player nei ṭha pahnih an ni.
State pawn player Sowkin Shetty (BCA) leh Rakesh Singh (TBL) te an inlan thei dawn, anni bakah hian tualchhung player ṭha Lalrina Renthlei leh H. Laldinsanga inelna a nih tel avangin a hmuhnawm dawn.
An incho
League round lamah team pahnih an intawng tawh a, an inkhel tawk hle. Overtime an khelh hnuah BCA lamin 90-85 in hnehna an chang a, an inthlauhna hi point nga chauh a nih avangin team pahnih an inthlau lo tih a chiang.
BCA coach Lalruatfela (Afela) chuan, "Kan khingpui tur hi kan huphurh hran lo, amaherawhchu final a nih tawh chuan boruak a danglam tawh ṭhin. Fimkhur tak chungin kan nomawi humhim ngei kan tum," tiin Vanglaini a hrilh a, an elpui team lakah tlawm a tum lo.
Vanglaini zawhna changin Khatla TBL coach Lalrinzuala (Rina) chuan, "BCA hian tun hma TBL vanglai ang kha an tawng a, an ṭha hle. Chutih rualin keini lam pawhin tawnhriat kan nei ṭha tawk a, mimal point nei thei deuhte veng chungin chak kan tum," a ti.
March 9, Thawhlehni
Playoff Game 1
Chawnpui BC 05:00 PM BC Bethlehem
Final Game 1
Zarkawt BCA 07:30 PM Khatla TBL
March 11, Ningani
Playoff Game 2
BC Bethlehem 05:00 PM Chawnpui BC
Final Game 2
Khatla TBL 07:30 PM Zarkawt BCA
March 13, Inrinni
Playoff Game 3
Chawnpui BC 05:00 PM BC Bethlehem
Final Game 3
Zarkawt BCA 07:30 PM Khatla TBL
MSL Sulhnu
Zarkawt BCA
MSL1: Final-ah Khatla TBL hneh lo
MSL2: Group Stage
MSL3: Semifinal-ah Khatla TBL hneh lo
MSL4: Champion
MSL5: Champion
Khatla TBL
MSL1: Champion
MSL2: Champion
MSL3: Final-ah Mission Veng Vikings hneh lo
MSL4: Semifinal
MSL5: Semifinal