MFA pual khelmual hawn a ni

Nimin tlai khan FIFA Forward Project hmanga siam MFA Ground, Sairang Dinthar chu sports minister Robert Romawia Royte-in a hawng. Hawnna neih hma hian ground tharah Grassroots Football Festival leh kum 50 chunglam ten Veteran Exhibition Football Match an khel bawk.

Sports minister Robert Romawia Royter chuan, "Football lover ka nih angin, FIFA puihnaa siam khelmual ka hawng thei hi ka lawm takzet a, AIFF leh FIFA chungah lawmthu ka sawi.

FIFA aṭanga artificial turf dawng thei tura MFA leh DFA hnathawh ṭhat avang leh, footballer te hlawhtlinnna avanga kan hawng thei hi a lawmawm a ni.

"Mizoram sorkarin football hmasawnna atan hna a lo thawk tawh a, Sports Minister ka nih khan minister hmasa hnathawh kal lai tihhlawhtlin ngei ka tum a, kan tihlawhtling ta ngei a, hna ṭhenkhat chawlhsan tawhte pawh kan chhunzawm leh thei a. Sports Minister ka nih hnuah hmalakna ṭhahnem tak kan nei a, football hmasawnna turin kan bei zel dâwn a ni," tiin ground thar siamna tur hma an lak chhunzawm tur thu a sawi.

Saitual leh Hnathial lam riin RRR chuan, "Saituala khelmual siam hna chawl tawh chu kan thar thawh a, Hnahthial lama khelmual siam chawlhsan tawh pawh kan puitlin thuai ang," tiin ground thar siam tura chak taka hmalak a nih thu a sawi.

MFA president Lal Thanzara'n ground hawnna kal khawmte chungah lawmthu a sawi a, Mizoram Synod moderator Rev Dr C. Lalhlira'n khelmual hi Pathian hnenah a hlan. FIFA aiawh rawn inlan South Asia development officer Prince Rufus chuan MFA-in FIFA aṭanga ground thar an neih chu ṭangkai taka hmang turin a chah.

MFA honorary secretary Lalnghinglova Hmar chuan, "He khelmual hawn niah hian MFA hruaitu hmasate kan hre reng a, player-te leh coach-te kan hre reng a, tun hma aṭanga an bul ṭan tawh kha keini hunlaiin a rah kan seng a ni ta ber a, kan zavaia thawh chhuah a ni a, kan zavaia khelmual inṭawm a ni," tiin MFA Ground chu football hmangaihtute thawhrah a nih thu a sawi a, ground siam dan report kimchang a pe.

AIFF hruaitute pawhin MFA duhsakna an hlan. President Praful Patel chuan, "AIFF chuan MFA kan lawmpui takzet. Kum tak chhung Mizoram aṭangin footballer ṭha tak tak an chhuak tawh a, player engemaw zat international thleng pha. Tuna artifical turf hi Mizoram tan malsawmna ni mawlh rawh se," tiin a sawi.

AIFF general secretary Kushal Das chuan, "Mizo mipuiin football an tuina hi state dang chunga leng an ni a, player-te pawhin theihna an nei sang hle. FIFA thilpek hmang hian MFA-in player ṭha zawk an chher chhuak ang," tiin MFA duhsakna a hlan ve bawk.

MFA Ground hawnnaah hian MFA leh District FA hruaitute bakah Mizoram aiawha feh chuak tawh footballer ṭhahnem tak an pung khawm a ni.

1. Sairang Dinthar Khawtlang : MSSC hnenah khelmual hi an hlan a, an thil phalna avangin ground hi a awm. August 14, 2013 khan MSSC, Sairang Dinthar VCP, Sairang Dinthar Games & Sports Association leh MFA aiawhte'n inremna ziakin he khelmual hi MFA kutah an hlan. 

2. Artificial turf neih theih dan kawng : MFA leh DFA hrang hrangte thawhrim zarah India rama inelna hrang hrangah Mizoram team-in result ṭha kan nei a, hei vang hian AIFF-in FIFA aṭanga artificial turf a dawn tur chu kum 2016 AIFF General Body Meeting-ah Mizoram kuta hlan a nih tur thu AIFF president Praful Patel chuan a puang.

Kawng awlsam erawh a la ni lo. Hetih hunlaia FIFA official hrang hrangte leh AIFF lamte chuan kum 2015 khan Mizoram rawn tlawhin MFA inrelbawlna hrang hrang an endik a, an hnathawh dan a hmunah an en a, mi hrang hrang an kawm kual a, chumi hnuah artificial turf hi an pe ta a ni.

3. Hmalakna leh Harsatna : March 21, 2016 khan FIFA consultant Prof. Eric Harrison chuan khelmual siamna tur hi a endik ṭan a, MFA chu khelmual lo lai zau a, 120x80 metre lo siam turin a chah. Kum 2016 August-ah MFA chuan khelmual laih zauh hna chu an ṭan a, beisei aia laih harsat avangin MFA sum khawlin a daih lo. 

MFA-in sorkar aṭangin ṭanpuina a dil a, NEDP aṭangin nuai 80 a hmu. Amaherawhchu, FIFA duh anga zau 120x80 an lai chhuak thei lo a, sum a tlem si avangin Lushai Engineers an bia. Lushai Engineers in pawisa phut loin an engineer-ten khelmual siam hna hi an vil a, sorkar department lam PWD engineer-ten enpui bawkin a bikin takin MFA patron Bowman-a pawimawh hle.

October, 2018-ah FIFA duh angin khelmual chu laih zawl a ni ta a, a thawk tura thlan FIFA contractor Edel Grass, Netherlands ten an thawhpui Acosa Sports, Mumbai-te nen an thawk ho a ni. Hna thawh hnuah pawh buaina tur a tam a, khelmual siamna bungrua an rawn thawnna chhiah pek a ngai a, MFA sum ṭhahnem tak hman a ni.

Kum 2019 kum tawpah zawh hman beisei ni mah se fur vangin kum 2020 nghah a ngai - Covid-19 hri a leng avangin harsatna an tawk a, February 18, 2021-ah khelmual hi an peih fel ta a ni.

▪️A line rin chin zau zawng (playing area) - 105x68 Metre

▪️Grass phah chin zau zawng - 111x74 (He mi pawnah hian kal kualna tur metre khat a awm chhuak vek)

▪️Bungraw dahna in 15x10 ft concrete-in sak a ni.

▪️Substitute bench, goal post (Mobile goal post 2 nen), corner flag dah a ni a, a vai hian dawn vek.

▪️Khelmuala grass kaihthawhna tur tractor bakah repair a ngaiha hman tur a awm.