Raptors champion lawmnaah silai a puak

North America-ah pawh hmar lama awm Canada khawpui pakhat Toronto khaw club Raptors chuan Golden State Warriors rorelna titawpin kar liam ta Zirtawpni khan Oracle Arena an luhchhuah a, 'Larry O'Brien Championship Trophy' chu an club history-a a vawi khat nan an chawi.

NBA champion lawmna hi chhun zan zawmin Toronto khawpuiah an kalpui a, chuai lai reng nei loin Thawhṭanni khan an lawmna ni ropui ber chu Canada prime minister Justin Trudeau leh Toronto mayor John Tory hoa hman a ni.

Championship parade-ah hian Toronto khaw tualah mipui maktaduai hnih vel zet an pung khawm a, anmahni huna chawhma dar 10:00-ah ṭanin Nathan Phillips Square-ah a tawpna an hmang.

Bay Street leh Albert Street-ah silai a puak a, mi sang tel hlau thla barin a thlan chhia. Silai puahna hmun hi Nathan Phillips Square aṭangin 700m vel lek a ni a, minute hnih kal vel a ni. Mi pali an hliam a, tarlan danin thih hlauhawm erawh an ni lo.

Police chuan thil thleng avang hian mi pathum an man a, thuneitute chuan an chhui chak theih nan 'video' an neih ang thawn turin mipui an ngen. Silai puak vangin an hun hman an khaihlak hlek a, hemi chhung hian prime minister Trudeau, mayor John Tory, Ontario premier Doug Ford leh Raptors player-te chu stage-ah an awm tlang a. Mipui pun khawmna Nathan Phillips Square hi 12 acre vela zau a ni a, mi tam zawk chu silai puak hian a tibuai pha lo.

Prime minister Trudeau chuan, "Inhliamte an dam vat theih nan duhsakna ka hlan a, Toronto police-te rang taka an chet avangin an chungah lawmthu ka sawi e. Kan hlawhtlinna hi tharum thawhhna hian a la kiang tur a ni lo," tiin a sawi.

Silai puak chu thil thleng pakhat chauh a ni a, Toronto khawpui lawmna tiṭhuanawp mah se an champion vanga an lawmna erawh a hliah khuh pha lo.

Mipui maktaduai hnih chuang pungkhawm hmaah Raptors team hian 'Larry O'Brien Championship Trophy' nen bus chhawnga chuangin kawng an zawh a, kum 1995-a din chauh tan chuan an thil tawn hi mumang ram ang mai a ni.

Canadian rapper, club ambas-sador ni bawk Drake pawhin hmun pawimawh chang phain mipui ngaihven erawh NBA Finals MVP Kawhi Leonard a ni. Kum 27 mi Kawhi hi nipuiah hian free agent a ni dawn a, Raptors ṭantuten cham turin an ngen nasa hle.