Zverev a chak phawt

Wimbledon inbuat-saihna tournament zinga pakhat, Halle Open-ah seeded pahnihna Alexander Zverev chuan a match hmasa berah hnehna a chang a, inkhel inhnehtawk takah Robin Hasse chu 6-4, 7-5 in a hneh.

German tlangval Zverev hian kuminah beisei angin a la khel chhuak lo. Dutch player lakah pawh a service ṭum pawhin double faults vawi sarih ngawt a neih avangin a dinhmun a nghet thei meuh lo. Mahse, darkar khat leh minute 45 an inkhelh chhung erawh chuan ṭum 12 aces a siam hman.

Seeded pathumna Karen Khachanov chuan 7-6 (5), 6-4 in Serbia tlangval Miomir Kecmanovic a hneh, seeded pangana Gael Monfils erawh 7-6(6), 6-4 in a hnam pui Pierre-Hugues Herbert lakah a chak lo thung. Nizan khan seeded pakhatna Roger Federer chuan a match hmasa berah John Millman a hmachhawn a, result kan hre hman lo. Nikum US Open-ah khan Millman hian Federer hi a lo hneh tawh a ni.