Premier League Engtinnge club-ten hlawh an kalpui?

Premier League pawh sum vanga talbuai zingah an bang bik lo. Inkhel a awm loh miau avangin sum lut tur a awm lo a, club tam takte buaina chu hlawh pekchhuah lamah a ni. 

England-a Professional Footballers' Association chuan an pawl be rawn lo chuan player-te chu hlawh tih hniam leh lak tlai chungchangah an club khelhna lo inrempui mai lo turin an hriattir. 

Premier League, English Football League, PFA leh League Managers' Association chu Nilaini khan an inhmukhawm tawh a, an buaina chungchang hi chinfel dan an ngaihtuah - club tinin an theihtawkah hma an la.

Gunners chuan an hnuaia a nghet loa hnathawkte chu April thla tawp thleng hlawh an pek tur thu an hrilh a, league an khelh leh hun tur sawn hlat a nih pawhin hlawh inpek dan tur an ngaihtuah zel tur thu an hnuaia a nghet loa thawk te hi an hrilh.

Bournemouth chuan sorkar hnuaia furlough scheme an hmang ṭangkai a, an hnuaia hnathawkte chuan sorkar hnuaiah hian an chawlh chhung 80% (thla khatah £2,500 aia tam a theih loh) hlawh an la dawn a, a bak zawng hi Cherries chuan an tum thung ang. 

Manager Eddie Howe, assistant boss Jason Tindall, chief executive Neill Blake leh technical director Richard Hughes-te chuan an hlawh an ti hniam bawk. 

Brighton head coach Graham Potter, deputy chairman & chief executive Paul Barber leh technical director Dan Ashworth -te chuan thla thum lo awm tur atan an hlawh an ti hniam. 

Barber chuan staff-te hnenah lehkha thawnin an hma hun a ên loh thu a sawi a, hetihrual hian hlawh ṭha taka an hmuh theih nan theihtawp an chhuah reng thu an sawi. 

Burnley chuan an hnuaia part-time a hnathawkte chu a pangngai ang renga hlawh an pek tur thu an sawi. 

Chairman Steve Parish chuan an hnuaia hnathawk zawng zawng, a ngheta thawk lo te pawhin an hlawh an hmuh vek tur thu a sawi. 

Everton pawhin an hnathawkte chu sum lama an harsat lohna tura a nihna ang taka an hlawh an hmuh reng tur thu an tiam a, a nghet loa thawkte pawh ṭha taka hlawh an pek reng tur thu a sawi. 

Newcastle United hi Premier League club zinga non-playing staff-te temporary leave pe hmasa ber an ni a, an hlawh an hmuh tur thu an tiam. Hetihrual hian club managing director Lee Charnley chuan an hnathawkte chu sorkar hnuaia 'furlough scheme' dil ve turin a ti!

Norwich chuan an staff-te dan pangngai anga hlawh an lak theih nan 'furlough scheme' an hmang a, an club innghahna Norfolk huam chhunga ṭanpui mamawhte tan £200,000 an thawh bawk - hei hi players, coaching staff leh executive team-te thawh khawm aṭanga an pek a ni. 

Spurs hnuaia non-playing staff 550 chuan thla hnih chhung atan 20% in an hlawh an ti hniam phawt a, nikuma kum khata pound maktaduai sarih laluttu club chairman Daniel Levy chuan a hlawh a ti hniam bawk. 

Premier League club zawng zawngin an hnuaia hnathawkte hlawh an pek dan leh player-te hlawh tih hniam chungchangah official-a thu puan chhuah an nei lem lo a, kan tarlan hi thuchhuah nei chin an ni. 

UK health secretary Matt Hancock chuan Premier League player-te chu an hlawh ti hniam vek turin a ngen a, an hlawh tih hniam hi non-playing staff-te hlawh atana hman turin a ti. 

Hancock chuan Premier League club ṭhenkhatin 'furlough scheme' an hman chu a dem a, mipui vantlang harsatna thlenna pakhat niah a ngai.