Champion lai Chile an Chungnung

Copa America champion lai Chile chuan nimin zing khan Japan 4-0 in an sawp a, Manchester United forward Alexis Sanchez chuan tun hnai thla nga chhunga a goal hmasa ber a khung bakah a ṭhiante thun tur a siamsak bawk.

Ningani zingah inelna an neih hnuhnung pahniha finalist Argentina leh Paraguay te an inkhel zui ve leh thung dawn. Lionel Messi te ram hi an match hmasa zawkah Colombia hneh loin an tlawm a, group stage paltlang an duh a nih chuan chak an mamawh tawh. 

Cicero Pompeu de Toledo Stadium, Sao Paulo-a inkhelah Chile tan Erick Pulgar-a'n goal hmahruai a khung hnuah Eduardo Vargas chuan goal hnihin a belhchah a, hun tawp hma deuhin Sanchez-a'n chak a nemnghet - January 25 hnua a goal khung lehna hmasa ber a ni.

Arsenal tan a khelh laiin Sanchez hian 2016-17 khan Premier League bikah chauh pawh goal 24 a khung, Manchester United a pan hnuah erawh season khat leh a chanve chhungin goal thum chauh a khung. Sanchez hi season hmasa tawp lam khan a khup leh ke rek hliam vangin a buai a, khelmual chhungah a inlan tam lo. Sanchez chuan, "Tun hnai chawlh kar ruk chhung kha chu tun hma lama ka la tawn ngai loh hringnun hrehawm ber a ni hial.

"Copa America kan khel a, inkhel chawhma lamah kha chuan ka talbuai. Second half-ah erawh zalenna zau zawk ka nei a, nuam ti leh hlim taka ka inkhelh theih tak avangin ka hlim hle," a ti. Sanchez hian ram tan match 125 aṭangin goal 42 a khung a, Chile tana goal khung hnem ber a ni.

Group C inkhel hmasa lamah Uruguay chuan Ecuador 4-0 bawkin an lo hneh tawh a, Asia khawmualpui aṭanga sawm luh Japan leh Ecuador ten point an la nei ve lo. Kumin Copa America atan hian Japan bakah Asia champion Qatar chu sawm an ni bawk.

Colombia 2-0 a an hneh loh hnuah Argentina captain Messi chuan, "Lungngaia indawm kun hun a ni lo a, match lehpekah chuan thawhchhuah kan tum ang," tiin a sawi. World champion vawi hnih ni tawh tan Paraguay hi fiahna an ni dawn.

Ram pahnihte an intawn hnuhnung ber chu 2016 kha a ni a, Argentina tan striker Sergio Aguero-a'n penalty hlah mah se Derlis Gonzales goal khat hmangin 1-0 in hnehna an chang, an intawn hnuhnung pakuaah Paraguay hian vawi khat chiah hnehna an chan vangin Messi leh a hote hi rinkai zawk an ni ang.

Argentina coach Lionel Scaloni chuan, "Tun ang inelna lianah hi chuan khingpui awlsam a awm thei lo, match hmasa zawka kan tlawmna kha kan tan zirlai ṭha tak a ni. Duhthusamin bul ṭan lo mah ila kan rilru a chiai lo tih kan lantir ang.

"Team chhunga player zawng zawng kan pawimawh dan a inang vek, tlarhnung leh a hmalam pawh ṭha lehzual zawka inthlunzawm a ngai," a ti. Coach hian a captain Lionel Messi chu an team tana ṭangkai thei ang ber tura an chhawr dawn thu a sawi bawk.

Barcelona thiampuipa Messi hi kum 31 mi a ni tawh a, club tan chawimawina leh nomawi dawn theih ang zawng zawng dawng tawh mah se, ram tan hlawhtlinna lian a la chang lo. Tun Copa America hi a tan hun ṭha hnuhnung a ni thei tawh hial ang.