Siami-ten Fiji an sawp

Ram leh ram hmeichhe hockey team hmanga inelna FIH Women’s Series Finals-ah nimin khan India chuan Fiji chu 11-0 ngawtin an sawp a, Mizo nula Lalremsiami Hmar chu goal hmahruai khungtu a ni.

Japan khawpui pakhat Hiroshima-a inkhelah minute lina lekah Siami'n goal a khung ṭan, India tan hian Gurjit Kaur chuan goal li a khung belh bakah Monika chuan goal hnih neiin, Rani Rampal, Vandana, Lilima Minz leh Navneet te chuan goal khat ṭheuh an khung bawk.

India hian an pool match zawng zawngah hnehna an chang vek a, pool A hmahruaitu nichungin semifinal an lut. June 22, Inrinni hian pool B lama pahnihna nen an intawng leh ang. Kolasib nula Siami chuan, "Harsa lutuk loin semifinal kan thleng ta der mai. Match thum kan khelh tawhah kan khel ṭha em em vek a, final sawi hun la ni lo mah se hlawhtlinna kan chan theih ngei ka beisei," tiin Vanglaini a hrilh. Siami hian Poland an hneh ṭumin goal a khung tawh bawk.

Hiroshima-ah hian team pariat an inel a, chung zinga pakhat chu India hi an ni. Anni ang tho hian Banbridge, Northern Ireland-ah team pariat tho an inel ve bawk, group aṭanga a ti ṭha pahnih ten 2019 FIH Olympic Qualifiers an khelh dawn avangin ram dang pawhin inelna hi an ngai pawimawh hle a ni.