Marta = 17 = World Cup goal khung hnem ber

FIFA World Cup-ah Brazilian hmeichhe footballer ropui Marta aia goal khung hnem an awm ta lo - Thawhlehni zan khan Italy lakah World Cup-a a goal 17-na a khung!

Brazil hian Italy hi 1-0 in an hneh a, round of 16 an lut chiang nghal bawk - US club Orlando Pride forward Marta goal khung hi minute 74-naa penalty aṭanga a khung a ni. Group C inkhel dangah Australia chuan 4-1 in Jamaica an sawp bawk a. Italy, Australia leh Brazil ten last 16 an lut vek a, Jamaica erawh point hmu loin an puanthuah an tel. 

Hmeichhe World Cup league round hi zaninah khelh zawh a ni tawh dawn a, Inrinni zan aṭangin Round of 16 hi an khelh chhunzawm lehnghal dawn a ni. 

Marta hian World Cup goal khung hnem ber ni turin Germany legend Miroslav Klose (16) a khum a, hmeichhia leh mipa zingah pawh ani aia World Cup-a goal khung hnem an awm lo tihna a ni. 

Football thuneitu sang ber FIFA chuan hmeichhe footballer ṭha berah vawi ruk ngawt a lo thlang tawh a, mak takin hmeichhe World Cup-ah erawh an ram team a la champion pui miah lo! Hmeichhe World Cup-ah hian 2003, 2007, 2011, 2015 leh 2019-ah te a inlan a, nomawi a chawi teuh ber chu kum 2007-a pahnihna an nih kha a ni. 

Kum 2003-ah hian goal thum a khung nghal a, 2007-ah goal sarih a khung zui. 2011-ah goal li a khung a, kum 2015 khan goal khat chiah a khung - tun inelnaah goal hnih a khung mek. 

Germany striker Miroslav Klose khan World Cup-ah goal 16 khungin record chelhtu a ni reng ṭhin a, hmeichhe football lam aṭangin Marta hian a rawn khum ta. 

Brazil legend Ronaldo khan match 19 a khelh aṭangin goal 15 a khung a, Klose hnuai chiahah a awm - West Germany striker goal khung thiam hmingthang Gerd Muller khan goal 14 a khung thung. Hmeichhe footballer zingah World Cup-a goal 14 khung thei pahnih an awm a, German striker Birgit Prinz leh US forward Abby Wambach te an ni - an chawlh tawh avangin Marta an khum thei tawh lo. 

Mipa lamah French legend Just Fontaine khan goal 13 a khung a, match ruk bak a mamawh lo thung - 1958 World Cup-a a khung vek a ni. Pele khan goal 12 a khung a, match 14 a inlan thung a ni. 

Group C chanchin 

Group C-ah Italy, Australia leh Brazil ten point ruk ṭheuh an hmu a, goal difference-a sang ber Italy hian hmahruaitu nichungin round of 16 an lut.

Jamaica laka 4-1 a chak Australia-in pahnihna dinhmun an hauh a, Brazil nen goal difference-ah in ang mah se 3-2 a Canarinhas (Brazil hmeichhe team sawina) an lo hneh tawh avangin pahnihna an ni. Brazil hian 2-0 ngawtin Australia lakah hian hma hruai hman mah se an inlehthaltir a, pathumna ti ṭha pali zinga tel vang chauhin last 16 an lut - chumi awmzia chu knockout round-ah an fixture a hautak dawn tihna a ni nghal. 

Canarinhas hian World Cup-a an inlan hnuhnung paruk 1999, 2003, 2007, 2011, 2015 leh 2019-ah te last 16 an lut vek a, tun ṭumah erawh thawnthu ziak danglama champion nih an beisei ang.