World Cup record thar siamtu Eoin Morgan

England captain Eoin Morgan chuan Cricket World Cup record thar siamin match khatah six vawi 17 zet a vaw chhuak. Thawhlehni inkhelah inelna thlengtu England-in 397/6 an siam a, 247/8 siamtu Afghanistan chu run 150 in an sawp.

Old Trafford-ah English batsman Eoin Morgan hian ball 71 lekah run 148 a siam a, six vawi 17 a vuak chu record thar niin Chris Gayle, AB de Villiers leh Rohit Sharma te record inṭawm vawi 16 chu a khum.

England chak danah nghawng nei chiah lo mah se BBC-a London-a cheng Richard-a thuziak (comment) hian inelna thlengtu chak dan ngaihnawmna a belhchhah.

Richard hian inkhelh hmain, "England-in hnehna an chang ang a, mahse he inkhel hi nomawi an chawi ka rin lohna chhan a ni. Kum hnih chhung khan huai takin ball kan vua a, khatiang kha chu nise run 380 kan pel ang a, 400 pawh kan thleng thei hial ang. World Cup kan thleng a, run 320 pawh kan vaw thleng dawn lo. England rilru put hmang hi ka hrethiam lo. World number 1 kan nih chhan pawh hi chhan eng emaw vang mai mai a ni," tiin an ram team a tih el.

Ṭhumvawra chak England-in bat hmasak thlangin bul an ṭan ṭha lo a, opener James Vince an chanin over 9.3-ah run 44 an la siam chauh. ODI batting ranking-a parukna Joe Root rawn lutin champion rinkai an nihzia an lantir a, Root (88) leh Jonny Bairstow (90) ten dinhmun ṭhaah England an dah.

Over 29.5-ah Bairstow hi Afghanistan captain Gulbadin Naib-a'n a vawm hlum a, England hian run 164 siam tawhin 6 runs per over an la pha lo deuh. Eoin Morgan hun a rawn thleng a, Afghan bowler ball vawm chu kil tinah a sem darh a, ball 77 lekah run 148 a siam.

England-in over 50-ah 397/6 an siam takah chuan an chak dawn tih a chiang tawh a, England ṭantute an pawr hle. Inkhelh ṭan hmaa tih eltu Richard an tih el let a, fuihtu ropui ang hialah an chhhuah. Ṭhenkhatin ṭawngkaisak a ngaih thu an sawi a, an lungawi tlanna erawh England-in run 397 zet an siam chu a ni a, India leh Australia telna inelnaah hian champion an inbeisei thar hle.

Kum 2011 khan England-in 327/8 zet an vaw chhuak a, Ireland chuan mak takin 49.1 overs-ah 329/7 rawn siamin World Cup history-ah record thar an siam. Thawhṭanni khan Bangladesh chuan West Indies target siam 322 chu over 41.3 lekah an umpha leh bawk. Amaherawhchu Afghanistan tan chuan team ṭha zawk England target siamsak 398 chu umphak rual a ni lo.

England bowler Jofra Archer leh Adil Rashid ten wicket thum ve ve an la a, Afghanistan-in over 50 erawh tlin thei hramin run 247/8 an siam a, run 150-in an chak lo.

Man of the match Eoin Morgan chuan, "Ka mang ṭhat ber ṭumah pawh hetiang ang innings hi chu ka beisei phak lo. Kum a tam zel a, hnung na chunga run siam ṭeuhte hi a awlsam lo. Ka tan chuan ni bik a ni a, World Cup anga inelna lian hi chu a nuam a ni," tiin kum 32 mi chuan a beisei phak baka a chet ṭhat thu a sawi.

Afghanistan captain Gulba­din Naib chuan, "An khel ṭha takzet a, a bik takin Morgan kha a che ṭha. Khatiang renga a chet ṭhat kha ka la hmu ngai lo," tiin Morgan a fak.