Federer leh Tsonga inhmachhawn dawn

Roger Federer-a'n a inkhelh thiamna grass court-ah season a hmang ṭan ve ta a, Thawhlehni zan khan a match hmasa berah John Millman hnehin Halle Open last 16 a inhlangkai.

Gerry Weber Stadion-a inkhelah Federer hian Australian tlangval lakah vawi kua aces siamin a service a hloh miah lo a, a khingpui service vawi khat chhuhsak chungin 7-6 (7-1), 6-3 in hnehna a chang. Kum 37 mi Federer leh Millman te hi nikum US Open-ah an intawng tawh a, Grand Slam vawi 20 champion tawh Federer a chak lo. Kuminah erawh tawnhriat ngah leh theihna nei sang zawk Swiss tlangval a chak.

Last 16-ah chuan Federer hian Jo-Wilfried Tsonga a hmachhawn leh dawn. Federer chuan, "Match hmasa bera hnehna chan hi chu engtiklai pawhin a lawmawm, grass court season a rei loh avangin inelna tin a pawimawh vek," tiin a sawi.

Kum 2011 Wimbledon-ah khan French tlangval hian Federer hi 3-6, 6-7 (3-7), 6-4, 6-4, 6-4 in a lo hneh tawh, tun ṭuma an inkhel tur pawh hi a hmuhnawm ang. World number 11 Tsonga hian inkhel dangah a hnampui Benoit Paire chu 6-4, 7-5 in a lo hneh ve thung a ni.

Seeded pahnihna Alexander Zverev chu a khupah hliam tenau a tawrh avangin doubles inelna bik aṭangin a inhnukdawk a, singles-ah erawh a inlan chhunzawm dawn. German tlangval hian zaninah Steve Johnson a hmachhawn leh ang.

Inkhel dangah champion lai Borna Coric chuan harsatna nei loin Spanish player Jaume Munar chu 7-6 (7-2), 6-3 in a hneh a, a match lehpekah Joao Sousa a hmachhawn leh dawn.