Mbappe a chhuak dawn lo - PSG president

Paris St-Germain president Nasser Al-Khelaifi chuan an player duhlai Kylian Mbappe chu tun nipui bazar hun chhunga an hralh loh tur thu a sawi chiang a, France forward hi an club-ah 200% in a cham dawn tih a chiang tih a sawi bawk.

Kum 20 mi Mbappe hian AS Monaco aṭanga a tira loan hmanga a zawm PSG-ah season khat chauh a nghetin a la khel a, Paris club tan hian season hmasa khan inelna hrang hrangah match 43 khelin goal 39 a khungsak a ni.

France international hi foot­baller beiseiawm berte zinga mi a ni mek, a kum la tam lo mah se khelmual chhungah a puitlin tawh avangin European club lian ṭhenkhat chuan sum tam taka lei chhuah an hreh lo. Sum ren lo Real Madrid nen sawi zawm a ni mek, Champions League nomawi chawitu Liverpool hming a ri tel bawk.

Al-Khelaifi chuan, "Player ṭha chungchuang hi ka chhuahtir lo ang. Club-in hma a sawn lehzual nan nasa zawka mawhphurhna lak a duh tih ka hria, mahse kei chuan kan club tana a pawimawhna leh kan hmachhawp ka hrilh. Zawhna dang min zawt chhunzawm lo.

"Mifing tak a nih avangin ka thu sawi kha a hriatthiam ka ring. Season tharah PSG jersey a ha chhunzawm dawn em tih min zawt maw? 100% hian a la sawifiah lo. 200% in a cham dawn tih hi ka chiang a ni," tiin a sawi.

Arab sumdawng hausa Al-Khelaifi hian hlawhtlinna lian zawk chan zel a duh a, pound maktaduai 200 zet senga an lakluh Neymar lakah pawh beiseina sang zawk an nei tih a hriat. Brazil international hi khel ṭha thawkhat mah se season hnih chhung chu Paris-ah a man phu tawkin a la khel lo.

Al-Khelaifi-a'n a player zingah 'celeb life' nei awm tawh lo se tih a duh thu a sawi tawh a, President thusawi duh dan aṭangin Neymar hi chhuahtir mai pawh an pawi ti lo niin a ngaih theih. Kum 27 mi Neymar hi May thla khan Rennes an ngam loh ṭumin fans laka a chet mawi loh vangin match thum hremna pek a ni a, Montpellier nen an inkhelh ṭumin dressing room lamah a teammate nen buaina an nei bawk. Ram tan pawh thla riat chhung captain a nih hnuah a armband chhuhsak a ni.

Al-Khelaifi chuan, "He hmun rawn kal tur hian tumah kan nawr lui lo a, duhthlanna a ni. Dan pangngai angin contract neih lai hi zah tur a ni, chutihrualin kan hmathlir atana theihtawp chhuah mite chu kan ngaih pawimawh ber tur a ni.

"Player dang ang bawkin Neymar pawh he hmuna rawn kal tur hian nawr luih a ni lo, kan project a thlirin kan hnena rawn kal a thlang a ni," tiin PSG tana 2020 thleng contract nei mektu Brazilian forward chungah ṭawngkam a duh tui teh chiam tawh lo.