Brazil goal khung pathum pawm a ni lo

Goal thum ngawt khung mah se pawm a nih miau loh avangin Brazil tan a tawk zo lo. Nimin zing khan Tite naute goal khung hmasa referee Julio Bascunan-a'n a pawm loh bakah a hnuhnung pahnih chu video assistant referee (VAR) hmanga hnawl a ni a, an mualah Venezuela nen 0-0 in an inhnehtawk.

Brazil hian match hnihah point li hmuin Copa America group A hmahruaitu chu an ni tho, mahse quarterfinal lut chiang tur chuan match dang an nghah leh rih a ngai dawn. Nimin zing inkhel dangah Peru chuan Bolivia 3-1 a hnehin knockout stage an hnaih zel.

Fonte Nova Arena-a inkhelah inelna thlengtu Brazil lamin a tir aṭanga a tawp thlengin khelmual chhungah ro an rel a, an mamawh ber goal erawh an sual chhuak zo lo. An goal neih tura ngaih pawh pawmsak an nih loh bawk avangin inkhel entu fans lamin an 'boo' khum nasa hle.

Tlarhma laia maltlat Roberto Firmino-a'n first half-ah goal hmahruai khungah a inngai. Mahse, Liverpool forward hian ball a chan dawnah Venezuela player a titlu hmasa a, referee Julio Bascunan-a'n thutlukna dik siamin a pawm sak lo.

Second half-ah Reds forward hian Gabriel Jesus goal khung tur siamsakah inngai mah se VAR hman a nih hnuah a offside tih a lan avangin pawm a ni chuang lo. Hun tawp dawnah Philippe Coutinho-a'n chakna goal ni ngei tura ngaih a khung a, goal lawmin an lam nasa hman hle.

Amaherawhchu Venezuela player, goal bula a hnung bera awm pakhat chauh hmaa awm Firmino chuan Barcelona forward-in ball a khawih hmain a lo khawih hmasak leh avangin Firmino hi a 'offside' leh hlauh.

Copa America thlengtu Brazil hian an match hmasa zawk Bolivia nen an khelh danah fans lam an lungawi tawh lo, tun ṭuma Venezuela nen an intawnah pawh first half chhungin ball possession 75% zet nei mah se goal zawnah vawi khat chauh an pet.

Brazil coach Tite chuan, "Fans lam dem theih an ni lo, keini pawh an zingah awm ve ila goal hmuh duhin kan au ve tho ang. An rilru leh dinhmun kan hriatthiampui, inkhel thunun tak chunga goal kan khung thei lo kha a pawi a ni," a ti. Brazil hian hliam vanga an chhawr theih loh Neymar an ngaiin a rinawm.

VAR sawi zuiin Tite chuan, "VAR kha a dik, a hunah tak khawl hman a ni a, kan nihna tak a lan chhuahtir avangin kei ni lam chuan sawi leh sel tur kan nei hran lo," tiin video assistant referee thutlukna a pawmpui thu a sawi.

Venezuela coach Rafael Dudamel pawhin VAR vanga an him chungchang sawiin, "Player malkhaia ṭha tak tak lakah ṭha takin kan khel thei, tun match bikah chuan kan tan VAR a pawimawh vet vet hle, he khawl ṭha tak hi awm reng rawh se," tiin an point hmuh theih nana puitu VAR a fak hle.

Venezuela hian match hnih aṭangin point hnih an hmu a, table-ah pathumna ni mah se an game hnuhnung berah tla chiang tawh Bolivia an hmachhawn dawn a, an chunga awm pahnih Brazil leh Peru te an intawn dawn bawk avangin knockout stage luh beiseina an la nei.

Copa America-ah hian South American ram 10 an inlan kim a, Asia khawmualpui aṭangin Japan leh Qatar te an sawm bawk. An match hmasa zawka Chile ngam lotu Japan leh champion hnem ber Uruguay (15 titles) te chu Zirtawpni zingah an intawng ang.

Luis Suarez leh Edinson Cavani te awmna ram hian hnehna an chang a nih chuan quarterfinal an lut dawn a, an khingpui Japan beiseina a thamral nghal thung dawn. Group C team dang pahnih champion lai Chile leh Ecuador te chu Inrinni zingah an inkhel ve thung dawn a ni.

World Cup champion hmasa ber Uruguay hian tun hnai an match hnuhnung paliah hnehna an chang vek a, goal khung an harsat lo. Mahse, tun ṭuma an khingpui tur Japan nena an inkhelh hnuhnung ber nikum October thlaah erawh Asian team hi 4-3 in an chak, Samurai Blues hi chetsual theihna tur an ni ang.