Dhawan-a World Cup a tâwp

Indian batsman Shikhar Dhawan chu Cricket World Cup khelh mekah kut zungpui hliam vangin a inlan thei tawh dawn lo a, wicketkeeper-batsman Rishabh Pant-a'n a thlak ang.

Kum 33 mi Dhawan hian June 9-a Australia an hneh ṭumin inhliam chungin run 117 a siam a, amaherawhchu a kut hliam vang hian Pakistan (June 16), Afghanistan (June 22) leh West Indies (June 27) a hmachhawn theih loh tur thu an ti­chiang nghal.

Nimin khan India rama cricket thuneitu sang BCCI chuan thu­chhuah siamin, "Specialist tam tak rawn a nih hnuah July thla laihawl thleng a kut hi tuam khawng tur a ni a, World Cup-ah a inlan thei tawh dawn lo," an ti.

Dhawan thlaktu tur kum 21 mi Pant hi squad-a telh a nih loh khan mak titu an tam. Pant hian Test match khela England leh Australia an tlawh ṭumin century a siam a, thla liam taa IPL khelh zawh takah khan a khel ṭha bawk.